Pas publikimit të klipit të ri “Four season”, i cili ka marrë tashmë një milion klikime në Youtube, Dafina Zeqiri është kthyer në temën e ditës për mediat ndërkombëtare.
Megjithatë, Dafina Zeqiri po prezantohet si “këngëtarja suedeze” në mediat e huaja. Ajo ka lindur në Suedi dhe u kthye në Kosovë kur ishte adoleshente, nga ku brenda disa vitesh hyri fuqishëm në tregun muzikor shqiptar.
Këngëtarja jetoi për 16 vjet në Suedi, ku mori pjesë në festivalet e këngës për fëmijë atje. Edhe pasi u kthye, bashkëpunoi me producentë suedezë, por sidoqoftë, këngët e saj u bënë të njohura kryesisht në trevat shqipfolëse.
Ndryshe nga Era Istrefi, e cila u bë e njohur në tregun ndërkombëtar të muzikës si këngëtare shqiptare, Dafina Zeqiri nuk po bëhet e njohur si shqiptare.
Uebsajti “Vibe”, i profilizuar tek muzika, promovoi dje këngën e re të Dafinës duke e quajtur “ylli suedez i muzikës”.
“French Montana i bashkohet yllit suedez të muzikës Dafina Zeqiri në videoklipin e këngës “Four Season”, është titulli i artikullit. Artikulli është shpërndarë nga vetë këngëtarja në “Instastory”, dhe po na bën pak konfuzë. Ndoshta kjo është strategjia e menaxherëve për të pasur sukses, pasi fshinë edhe fotot në “Instagram”, duke bërë që këngëtarja shqiptare t’ia nisë nga e para.
