Ndërsa çdo 14 shkurt çiftet në mbarë botën festojnë Ditën e Shën Valentinit si simbol i dashurisë romantike, një ditë më herët shumë vajza zgjedhin të festojnë një tjetër traditë moderne, Ditën e Galentinit. Kjo festë, që bie më 13 shkurt, është kthyer në një moment kushtuar miqësisë dhe lidhjeve të veçanta mes grave.
E njohur si “Shën Valentini i vajzave”, Dita e Galentinit synon të vlerësojë shoqet, motrat, nënat apo çdo figurë femërore të rëndësishme në jetën tonë. Edhe pse nuk është një festë zyrtare në kalendar, ajo është përqafuar gjerësisht si një mënyrë për të festuar mbështetjen, solidaritetin dhe lidhjet emocionale mes grave.
Origjina e kësaj dite lidhet me kulturën pop. Termi u bë i njohur në vitin 2010 përmes serialit komedi Parks and Recreation, ku personazhi Leslie Knope, i interpretuar nga Amy Poehler, e përshkroi si “ditën më të mirë të vitit”. Në episodin përkatës, ajo shpjegon se çdo 13 shkurt feston me shoqet e saj, duke e kthyer këtë moment në një traditë të miqësisë femërore.
Në thelb, Dita e Galentinit shihet si një alternativë festive ndaj Shën Valentinit tradicional. Në vend të fokusit te çiftet romantike, kjo ditë thekson energjinë pozitive, fuqizimin dhe rëndësinë e miqësive mes grave. Festa është gjithëpërfshirëse dhe nuk lidhet me statusin sentimental qofshin beqare, në një lidhje apo të fejuara, të gjitha janë të mirëpritura të festojnë.
Sot, Dita e Galentinit po fiton gjithnjë e më shumë popullaritet si një mënyrë për të kujtuar se dashuria dhe vlerësimi nuk kufizohen vetëm te marrëdhëniet romantike, por shtrihen edhe te lidhjet e forta miqësore që na shoqërojnë çdo ditë.
