Mbrëmjen e djeshme në vendin tonë mbërritën dy avionë të tjerë me qytetarët që janë arratisur nga Afganistani. Të gjithë ata u vendosën në godinën 11-të në “Qytetin Studenti”, në mënyrë që të kenë afër menzën dhe qendrën shëndetësore.
Në një intervistë për “Top Channel” disa prej tyre kanë treguar se si ndihen në Shqipëri dhe si është aktualisht situata në Afganistan.
“Ne sot jemi të relaksuar. Faleminderit Shqipërisë për koordinimin dhe të ndihmuarin që ne të jemi gjallë. Unë në Afganistan kam punuar ti teknolog ushqimesh për një kompani që prodhonte ujë mineral. Lamë pas një situatë shumë të rëndë. Nëna ime dhe vëllezërit janë ende atje. Mbrëmë ne mbërritëm këtu dhe mendja ime nuk ishte e qetë. Se çfarë do të bëjmë për të ardhmen do të vendosim në vazhdim nëse do të qëndrojmë këtu apo do të dalim nga Shqipëria”, është shprehur Rashid Ahmad Azim.
Ndërsa bashkëshortja e tij, Lima, ka shtuar se ata janë larguar nga Afganistani për të rritur vajzën e tyre të lirë.
“Unë jam e gëzuar për veten time dhe familjen që erdhëm këtu por më mungojnë prindërit dhe atdheu im. Ishte e vështirë për ne ta linim Afganistanin, të linim atje familjet dhe prindërit në atë situatë. Nuk e di çfarë do të na ndodhte nëse vijonim se jetuari atje. Isha e vogël kur prindërit më thoshin se Talebanët nuk ishin njerëz të mirë dhe nuk na lejonin ne vajzave të shkonim në shkollë dhe gratë të punësoheshin. E lamë Afganistanin pasi duam që vajza jonë të rritet e lirë. Të studiojë e të ketë një jetë të mirë. Jo si jeta jonë. Ne jemi këtu vetëm për vajzën. Jemi të kënaqur me akomodimin dhe çfarë na është ofruar këtu”, thotë ajo.
Id Muhamed Hashmi ka treguar se çfarë pritet të nddhë tashmë në Afganistan nën pushtimin e talebanëve.
“Ndjehem shumë mirë me të vërtetë shumë mirë. Moti është i mirë këtu. Mundëm të dilnim nga Afganistani. Unë kam punuar atje për USAAID si menaxher për komunikimin. Kam lënë pas vëllezërit dhe motrat bashkë me prindërit. Kjo është familja imë që mundëm të shpëtonim e dilnim nga atje. Situata që lamë ishte shumë e tensionuar. Nuk e dimë çdo të ndodhë në të ardhmen. Është mundësia e një lufte civile atje gjë e cila na kthen 20 vite pas në kohë, e do të prodhojë me mijëra refugjatë. U arritën shumë gjëra këto 20 vite, por në vetëm pak momente u shkatërrua gjithçka”, është shprehur Id Muhamed Hashmi.
