Artan Zymberaj një i ri nga Peja, i dënuar me 3 vjet burg, në Serbi, ndërroi jetë para disa ditësh në burgun e Stremska Mitrovica.
Sipas gazetës “Nacionale”, familjarët e viktimës po dyshojnë, se Artanin e vranë në burg, sepse ai mbante tatuazhe me motive kombëtare. E njëjta media ka siguruar foto të Artan Zymberajt, ku shihet se kishte tatuazhe të ndryshme, me motive kombëtare.
Edhe automjeti me të cilin Artani po hynte në Serbi përmbante elemente të flamurit kombëtar, e që sipas familjarëve është ende në duart e institucioneve serbe.
Siç raportojnë familjarët brenda burgut ka rënë një zjarr. Artani vdiq vetëm disa ditë pas kësaj ngjarjeje.
Dyshimet kryesore të familjes Zymberi janë se ai u vra në burg sepse mbante në gjoks tatuazh Adem Jasharin, e në krahëror Skënderbeun.
“Ngjarja që u djeg burgu ka ndodhur me 22 nëntor. Aty është raportuar vetëm se janë lëndu 4 gardianë. Ne na kanë thënë në fillim se ka ndërruar jetë prej zemrës, pastaj prej lukthit. Atë raport Serbia ja ka dërguar Norvegjisë. Por ne nuk e kemi pranu raportin, se Artani ka vdekë prej shkaqeve natyrore, sepse pra, pak ditë më herët ka pasë shpërthim në burg. Kemi kërku, obduksionon me bë në Norvegji, për me i ditë shkaktarët”, tha njëri nga familjarët.
Familjarët shtojnë se kur e kanë vizituar Artanin në burg, ai ka qenë i maltretuar.
“Kur ka shkuar nëna e Artanit në vizitë aty në burg, e ka pa se djali është malltretuar. Madje ai është frikësu me bë muhabet të lirë, me nënën e tij. Sipas nënës, gjatë vizitës në burg Artani tërë kohën e ka kthyer kokën pas, duke u frikësuar se dikush po i vjen nga mbrapa”
Familjarët e Artanit thonë se kanë kërkuar ekstradimin e djalit të tyre, për në Norvegji.
“E kemi kërku për me ekstradu në Norvegji. Në Serbi e malltretojshin, e rrahnin. E pamë se djali i ka punët keq. Por qe tash, në proces të ekstradimit jemi kanë, por Artani vdiq. Ne jemi të bindur se e kanë mbyt, veqse ka pasë tatuzhat me Adem Jasharin e me Skënderbeun, edhe kur e kanë arrestu ka qenë me veturë, me një shqiponjë të madhë përpara” deklaron një familjar. Madje për këto pretendime, familjarët pretendojnë se e kanë një dëshmitar, i cili gjindej në burg me Artanin, e që është nga Siria.
Burimi i Gazetës Nacionale, tregoi se Artan Zymberi, u arrestua në kufi me të hyrë nga Kosova në Serbi, para një viti. Arsyet e arrestimit të tij, sipas burimit, ishin sepse Artanit iu gjetën disa medikamente, të cilat ai po i merrte me vete për në Norvegji. Për Artan Zymberin u nis edhe procesi gjyqësor dhe ai u dënua, me 3 vjet e gjysmë burgim.
