Në kinematë e qytetit po shfaqet “Tuneli”, një film i konceptuar mbi një tregim të Pëllumb Kullës, por i rishkruar me një skenar, që i flet politikës së ditëve të sotme nga Ilir Harxhi, i cili është dhe regjisor i filmit.
Mes emrave si Robert Ndrenika, Enver Petrovski, Arben Derhemi, etj, pamë se një rol kishte edhe Egla Harxhi, e cila është e bija e Ilir Harxhit. Ajo është bashkëshortja e shoferit të kryeministrit, luajtur nga Arben Derhemi, një prej personazheve kryesorë të filmit.
Një rol i cili nuk mund të themi episodik, pasi Egla ishte pjesë e disa skenave.
Egla ka studiuar për arkitekturë e më pas aktrim. Megjithatë të parën nuk e ka përqafuar si profesion, sepse tek ajo ka qenë më e fortë dëshira për t’u shprehur dhe për të performuar, prandaj fotografia dhe modelingu janë fushat ku e kemi parë më tepër.
Së shpejti, Egla pritet të bëhet nënë e një djali nga marrëdhënia e saj me Alexandre Ale De Basseville dhe Aleksian, të cilin do ta quajnë Lucifer.
