Sektori i bareve dhe restoranteve është padyshim një prej më të prekurve nga pandemia e koronavirusit si në botë, ashtu dhe në Shqipëri, ku mendohet se 30-50 % e këtyre bizneseve në Tiranë nuk do të mundet dot t’i mbijetojë krizës me të cilën po përballen, sipas një deklarate të Shoqatës së Bareve Restoranteve dhe Club-eve. Teksa dalë ngadalë pritet që gradualisht aktiviteti i tyre të rifillojë pas datës 18 maj, deri më tani, mundësia e vetme e mbijetesës për këto biznese ka qenë shërbimi i shpërndarjes që i ka mundësuar të rezistojnë sadopak në kushtet e izolimit. Por për këdo që nuk e ofronte paraprakisht këtë shërbim, nevoja për t’u përshtatur me realitetin e ri të pandemisë bëri të domosdoshëm bashkëpunimin me platformat e shpërndarjes së ushqimit.
Në thelb, bashkëpunimi me këto kompani supozohet të jetë një ndihmesë e madhe për bizneset në vështirësi, duke qenë në shumë raste e vetmja urë lidhëse mes tyre dhe klientëve që nuk munden më t’i vizitojnë në lokale. Madje CEO i platformës “Baboon”, e para e këtij lloji në Shqipëri, është shprehur në një intervistë për revistën “Monitor” se falë punës së kompanisë së tij, bizneset partnere kanë mundësinë që pavarsisht izolimit, të çojnë para në shtëpi.
Por në realitet, pamja nuk është aq rozë. Prej javësh, restorante e fast food-e kanë nisur të largohen nga platforma “Baboon” për shkak të rritjes së tarifës që bizneset paguajnë në bazë të porosive që marrin nëpërmjet aplikacionit. Administratorë të shumtë restorantesh, të irrituar kanë braktisur bashkëpunimin me “Baboon” për shkak se u është kërkuar të paguajnë një tarifë prej 20 % + TVSH të vlerës së porosive të marra në aplikacion, një shifër kjo tejet e lartë jo vetëm gjatë pandemisë që rrezikon t’i fundosë tërësisht këto biznese, por edhe në kohë qetësie. Në një tentativë për të përfituar në kohën kur sherbimi “delivery” është e vetmja mënyrë mbijetese për këtë sektor, “Baboon” i ka shtrënguar edhe më tepër lakun në fyt bizneseve partnere, në vend që të ofronte lehtësi për to sikurse kanë bërë kompani të tjera(lexo këtu).
Por problemet me “Baboon” janë dhe më të hershme. Në përpjekje për të krijuar një monopol në tregun e shërbimit të shpërndarjes së ushqimit, “Baboon”, duke qenë e para platformë e tillë në vendin tonë, në kontratat e bashkëpunimit ka vendosur një klauzolë që specifikon se bizneset partnere me të, nuk mund të bashkëpunojnë me asnjë kompani të ngjashme sikurse është “Snapfood” për një periudhë minimalisht 2-vjeçare.
Pra përveçse rrit tarifat e shërbimit në periudhën më të errët për biznesin, “Baboon” gjithashtu nuk i lejon subjektet që janë pjesë e tij që të bashkëpunojnë me platforma të tjera, çka do të ishte pikërisht një dorë tjetër parash që këto biznese dhe të gjithë të punësuarit e tyre mund të çonin në shtëpi.
Por një gjë e tillë nuk është thjesht e gabuar në planin moral dhe etik, por bie në kundërshtim të plotë me ligjin që mbron konkurrencën e lirë në Republikën e Shqipërisë. Burime për “iconstyle.al” bëjnë me dije se për këtë shkelje është njoftuar dhe Autoritetit të Konkurrencës, institucioni që supozohet të sigurojë respektimin konkurrencës së lirë në treg. Mirëpo pavarësisht ankesave, sërish asgjë nuk ka ndryshuar, çka do të thotë: Ose çështja është lënë të pluhuroset në ndonjë raft sepse dikush “përton” të merret, ose ndërhyrhja e dikujt ka bërë që hetimi të mos nisë aspak ose të mos shohë kurrë dritën e diellit.
Lidhur me këtë çështje, “iconstyle.al” gjithashtu ka kontaktuar si Autoritetin e Konkurrencës, ashtu dhe CEO-n e “Baboon” Genti Selenica, por nuk ka marrë përgjigje nga asnjë prej palëve.
