Një aplikacion i ri që u vjen në ndihmë të gjithë banorëve të Tiranës që përdorin transportin publik, është krijuar së fundi.
“Tirana Public Transport” quhet aplikacioni i krijuar nga Akil Rajdho, i cili tregon lëvizjen në kohë reale të autobusëve.
“Aplikacioni funksion duke marrë të dhënat e të gjitha linjave të autobusit me anë të pajisjeve GPS, të instaluara në shumicën, 99% të autobusëve në Tiranë. Pikat blu në hartë janë vendndodhja e autobusëve në kohë reale, e cila përditësohet çdo 10 sek”, u shpreh Akil Rajdho, programues i TPT për Top Channel”.
Aplikacioni që shkarkohet fare lehtë në App store, pa kosto apo humbje kohe, të çon në destinacionin që dëshiron, mjafton të shënosh rrugën ku je dhe atje ku do të shkosh.
“Pjesa kryesore e funksionalitetit të aplikacionit është që ti të arrish të gjesh vendin ku do të shkosh duke përdorur një linjë autobusi. Dhe duke klikuar butonin drejtimet sistemi të thotë që ke për të bërë 932 metra, ke për të bërë 4 stacione. Stacioni í nisjes është Qendër, stacioni i fundit mbërritjes Medreseja. Dhe shkohet me linjën e Kombinatit”, thotë Rajdho.
Synimi i Akilit është që ky shërbim të mundësohet edhe për transportin ndërqytetas, jo vetëm për atë brenda Tiranës. Por fillimisht, duhet të përmbushen disa hallka që mungojnë në aplikacion për 300 përdoruesit që janë deri më tani.
“Problemi që kemi hasur është mungesa e informacioneve, s’kemi ngjyrat zyrtare të autobusëve apo oraret e tyre”, shprehet ai.
