Tamponët që bëhen për të treguar nëse je ose jo pozitiv me koronavirus, do të bëhen edhe në laboratorin e mikrobiologjisë në Qendrën Spitalore Universitare.
Top Channel raporton se në këtë laborator do të mund të kryejnë tamponin pacientët që duhet të lënë ambientet e shërbimeve të QSUT. Kjo bëhet për të parë nëse janë negativ dhe nëse mund të shkojnë te familjet e tyre pa i rrezikuar ata.
Tamponin në laboratorin e QSUT do ta kryejnë edhe pacientët e prekur nga COVID- 19 që duhet të lënë ambientet e Shërbimit Infektiv.
Deri më tani tamponët janë kryer vetëm në laboratorin e Institutit të Shëndetit Publik dhe ngarkesa është tejet e madhe.
Ka shumë persona në dyshim se mund të jenë infektuar, që presin të bëjnë tamponin me ditë të tëra, dhe njëri prej tyre na ka shkruar personalisht për të bërë publike këtë problematikë:
“Kam kontaktuar 127, më thanë se sinjalizimin për mua e kanë pat bërë që më datë 29, ndërkohë kam që të shtunën sëmurë dhe kam që prej të shtunës që i kontaktoj. Dje me dhanë dy numra të tjerë për të kontaktuar 8004040 dhe një tjetër, i mora. 8004040’ta me tha se te kanë deleguar kot, ndërkaq numri tjeter nuk përgjigjet”, shprehet personi për iconstyle.al.
Edhe Instituti i Shëndetit Publik e ka shprehur se nuk mund të përballojë më tepër testime. Në një letër që u bë publike ai i drejtohej Ministrisë së Shëndetësisë, ku thuhej se për shkak të mungesës së kapacitetetve, ISHP e kishte të pamundur të kryente testimin masiv të popullatës për COVID-19.
Në shkresë, ISHP i kërkonte ministrisë që të paktën testimet që nevojiten për efekt dokumentacioni, kryesisht për personat që udhëtojnë jashtë Shqipërisë, të kryhen në laboratorë të jashtëm të certifikuar nga ISHP, duke nënkuptuar laboratorët privatë.
Pak ditë më parë OBSH u bëri thirrje qeverive të ndjekin shembujt e Gjermanisë, Koresë së Jugut dhe Japonisë, të cilat e mbajtën nën kontroll shpërthimin përmes politikave që përfshinin testimet dhe gjurmimet e rrepta.
Rikthimi i shifrave të larta të të prekurve nga koronavirusi në Shqipëri ka rindezur shqetësime të shumta, duke nisur me frikën e një izolimi të ri për të frenuar përhapjen e virusit, si dhe pamundësinë e institucioneve shtetërore për të kryer testimet e nevojshme.
/Iconstyle.al
