Ministri i Punëve të Brendshme i Qeverisë së Kosovës, Xhelal Sveçla, ka deklaruar se sot (17 Qershor) në pikëkalimin kufitar në Jarinjë – që lidh Kosovën me Serbinë –është arrestuar një person që ka sulmuar gazetarët në veri të Kosovës.
Sveçla tha se bëhet fjalë për Dalibor Spasiç.
“Në vendin tonë demokratik, aktet kriminale nuk kalojnë pa pasoja. Këtë duhet ta dijnë edhe ata për të cilët nuk ka pasur pasoja ligjore për gjithë këto vite. Republika nuk zmbrapset përballë kriminelëve e milicisë fashiste”, ka shkruar Sveçla në Facebook.
Zyra për Kosovën në Qeverinë serbe ka reaguar pas këtij arrestimi duke thënë se Spasiç “nuk është kriminel”, por punonjës shëndetësor në spitalin në Mitrovicë.
Përmes reagimit, Zyra për Kosovën në Qeverinë serbe e akuzoi ministrin Sveçla se po tenton të “kriminalizojë” Spasiçin vetëm nëse shikon keq ndonjë gazetar.
Edhe Lista Serbe – partia më e madhe e serbëve në Kosovë – ka reaguar pas arrestimit në Jarinjë, duke kërkuar ndërhyrjen e faktorit ndërkombëtar.
“Ky është momenti i fundit që bashkësia ndërkombëtare të ndërhyjë drejtpërdrejt dhe ta pengojë [kryeministrin e Kosovës, Albin] Kurtin të nisë një luftë, sepse me veprimet e tij ai do ta detyrojë të gjithë popullin serb të mbrohet nga sulmi i Prishtinës dhe atëherë do të ishte një rrugë pa kthim, që asnjë njeri normal nuk e dëshiron, sepse ishte katastrofike për të gjithë në këto zona”, u tha në reagimin e kësaj partie.
Më 16 qershor u arrestua Nemanja Vllashkoviç në Leposaviç, për sulmin ndaj gazetarëve që ndodhi më 29 maj.
Edhe me 16 qershor, gazetarë të mediave të ndryshme, sipas Policisë së Kosovës, “janë sulmuar fizikisht, në mënyrë brutale”, teksa po raportonin nga komuna e Leposaviçit, një prej katër komunave në veri, të banuara me shumicë serbe.
