Një valë e gjerë sulmesh kibernetike ka vënë në alarm autoritetet në Gjermani, ku rreth 300 zyrtarë të lartë dyshohet se kanë rënë pre e skemave “phishing”. Mes të prekurve përmendet edhe Presidentja e Bundestagut, Julia Klöckner, duke e ngritur çështjen në nivelet më të larta të sigurisë shtetërore.
Sipas Shërbimi Federal për Mbrojtjen e Kushtetutës, sulmet janë realizuar përmes aplikacionit të mesazheve Signal, duke synuar politikanë, diplomatë, personel ushtarak dhe gazetarë. Përmes teknikave të mashtrimit digjital, autorët dyshohet se kanë arritur të fitojnë akses në komunikime private dhe kontakte, përfshirë edhe biseda në grup.
Edhe pse shkalla e plotë e dëmit mbetet ende e paqartë, ekziston frika se të dhëna sensitive mund të jenë komprometuar. Në rastin e Klöckner, raportohet se mund të jenë ekspozuar edhe kontaktet e kancelarit Friedrich Merz, çka shton shqetësimet për përdorim të mundshëm të informacionit për qëllime shantazhi.
Revista Der Spiegel, duke iu referuar burimeve të sigurisë, e vlerëson numrin e viktimave në rreth 300 persona, ndërsa rasti është cilësuar si “jashtëzakonisht shqetësues” nga përfaqësues të komitetit parlamentar të inteligjencës.
Autoritetet gjermane dyshojnë për përfshirjen e një aktori kibernetik të mbështetur nga shteti, ndërsa edhe FBI ka paralajmëruar për sulme të ngjashme të lidhura me grupe pranë inteligjencës ruse. Ndërkohë, qytetarëve u bëhet thirrje për vigjilencë të shtuar, pasi fushata e sulmeve konsiderohet ende aktive.
