Një ngjarje e rëndë ka tronditur qytetin e Milanos, ku një grua 62-vjeçare është sulmuar brutalisht me thikë nga ish-bashkëshorti i saj. Ajo u gjet pa ndjenja dhe e mbuluar me gjak në rrugë, në zonën veriore të qytetit, rreth orës 09:50 të mëngjesit të së martës.
Policia lokale ndërhyri menjëherë dhe gruaja u transportua me urgjencë në Spitalin Niguarda, ku mbërriti në arrest kardiak dhe u fut menjëherë në sallën e operacionit. Sipas burimeve mjekësore, ajo kishte plagë të shumta me thikë, duke përfshirë një plagë të thellë në qafë me dëmtime serioze në vena.
Dyshohet se sulmi ndodhi brenda banesës së saj, përpara se viktima të dilte në rrugë për të kërkuar ndihmë. Ish-burri, 64 vjeç, është parë nga dëshmitarët duke u larguar me skuter, me një helmetë që ia mbulonte fytyrën. Ai është ende në kërkim nga karabinierët, të cilët po hetojnë ngjarjen dhe po përpiqen të rindërtojnë rrethanat e sulmit.
Një fqinje ka rrëfyer për mediat se kishte dëgjuar britma dhe kishte parë gjakun në rrugë. Dëshmitarët flasin për një ndjekje të mundshme prej më shumë se një muaji nga ish-bashkëshorti.
Çifti ishte ndarë para tre vitesh për arsye financiare. Autoritetet po verifikojnë nëse gruaja kishte shprehur më parë ndonjë shqetësim për dhunë apo kërcënime nga ish-partneri. Hetimet janë në zhvillim.
