Një studim i ri i Universitetit të Harvardit dhe Spitalit të Përgjithshëm të Masaçusetsit ka zbuluar se marrja e përditshme e vitaminës D3 mund të ngadalësojë procesin e plakjes biologjike. Hulumtimi, i publikuar në American Journal of Clinical Nutrition, përfshiu 1,031 të rritur që morën 2,000 IU vitaminë D3 <50 mikrogramë> çdo ditë, për katër vjet. Rezultatet treguan se pjesëmarrësit që përdorën vitaminën kishin dëmtime më të vogla të ADN-së dhe telomere më të gjata, shenja të qelizave që plaken më ngadalë.
Vitamina D3, e njohur si “vitamina e diellit”, dihet për rolin e saj në forcimin e kockave dhe imunitetit, por ky studim sugjeron se ajo mund të mbrojë edhe vetë ADN-në. Sipas autorëve, ajo redukton stresin oksidativ dhe inflamacionin qelizor, duke ndikuar drejtpërdrejt në procesin e plakjes.
Mungesa e vitaminës D është e përhapur në mbarë botën, madje edhe në vende me diell dhe lidhet me probleme si depresioni, lodhja dhe sëmundjet e zemrës. Ekspertët theksojnë se rikthimi i niveleve optimale të kësaj vitamine u jep qelizave “mjetet për t’u riparuar”.
Vitamina D3 ofron një mënyrë të thjeshtë, të lirë dhe të sigurt për të mbështetur plakjen e shëndetshme. Studiuesit paralajmërojnë se nuk është “pilulë mrekullie”, por mund të ndihmojë në ruajtjen e forcës jetësore edhe në moshë të madhe.
