Një raport i fundit i publikuar nga ekspertët ndërkombëtarë të shëndetit publik ka nxjerrë në pah një paralajmërim serioz: të rinjtë e sotëm janë në rrugën e një krize të madhe shëndetësore që pritet të shpërthejë deri në vitin 2030. Sipas studimit, faktorët kryesorë që po çojnë drejt kësaj gjendjeje alarmante janë stili i jetesës sedentare, ushqimi i pasur me sheqerna dhe yndyra të dëmshme, ekspozimi i tepruar ndaj teknologjisë dhe rënia drastike e aktivitetit fizik. Gjithashtu, shëndeti mendor paraqitet në krizë, me raste gjithnjë e më të shpeshta të ankthit, depresionit dhe vetëizolimit social.
“Nëse nuk ndërmerren masa urgjente dhe të qëndrueshme për të edukuar dhe ndërgjegjësuar të rinjtë, vitet që vijnë do të përballen me një brez që vuan nga sëmundje kronike që në moshë të re,” – thuhet në raportin shkencor.
Ndër problemet më të zakonshme që pritet të prekin të rinjtë përfshihen:
-Obeziteti dhe diabeti i tipit 2
-Sëmundjet kardiovaskulare
-Probleme të shëndetit mendor (stresi kronik, ankthi, depresioni)
-Dëmtime të shikimit dhe shtyllës kurrizore nga përdorimi i pajisjeve dixhitale
Përveç aspekteve individuale, kjo situatë përbën edhe një sfidë serioze për sistemet shëndetësore globale, të cilat mund të mos jenë të përgatitura për të përballuar një barrë kaq të madhe në një moshë kaq të re të popullsisë. Ekspertët sugjerojnë që edukimi shëndetësor të fillojë që në shkollë, të rritet ndërgjegjësimi për ushqyerjen e shëndetshme dhe aktivitetin fizik, si dhe të promovohet mirëqenia mendore përmes politikave mbështetëse. Nëse ky trend vazhdon, brezi i ri mund të jetë i pari që jeton më pak se prindërit e tyre, një alarm që nuk duhet injoruar.
