Puna fizike është jo vetëm më e shëndetshme për njeriun se sa ajo përpara një tavoline dhe një tastjere kompiuteri, por e para ul ndjeshëm edhe rrezikun e infektimit nga koronavirusi.
Në të kundërt, ata që shkojnë rregullisht në punë dhe sidomos në zyra, kanë më shumë mundësi të infektohen nga koronavirusi se sa ata që punojnë nga shtëpia, apo edhe në ambiente të hapura.
Këtë gjë e ka analizuar studimi i “Centers of Disease Control and Prevention” (Cdc – Qendrat Amerikane të Kontrollit dhe Parandalimit të Sëmundjeve), për të nxitur punën në distancë.
Studimi i publikuar në “Morbidity and Mortality Ëeekly Report” (MMËR) tregohet se, rreziku i infektimit për ata që punojnë në zyrë është madje dyfish më i lartë se sa ata që mund ta bëjnë punën nga shtëpia.
Analizimi i rasteve
Ekspertët për të arritur në përfundimin e studimit, analizuan ekspozimin e mundshëm të punonjësve ndaj koronavirusit, duke intervistuar 314 amerikanë që kanë bërë tamponin në muajin korrik.
Prej këtu, studiuesit krahasuan intervistat e personave të rezultuar pozitivë (153 punonjës) dhe negativë (161 persona). Analizat treguan se, dy javë para tamponit, ata që rezultuan pozitivë, kishin më shumë gjasa të thoshin se kishin shkuar rregullisht në zyrë.
Studiuesit zbuluan se, probabiliteti është dyfish më i madh për t’u infektuar tek ata që shkojnë çdo ditë në punë, krahasuar me ata që shkojnë ndonjë ditë në javë, ose punojnë me kohë të plotë nga shtëpia.
Megjithëse ka kufizime në studim, siç janë ndryshimet e mundshme midis njerëzve të gatshëm të marrin pjesë në sondazh dhe atyre që refuzuan, ose marzhi i gabimit të tamponëve, ekspertët shpjegojnë se këto rezultate, japin prova të efekteve të dobishme te shëndeti i punës nga shtëpia.
Puna në distancë
“Sipërmarrjet dhe punëdhënësit duhet të promovojnë mundësi alternative, të tilla si puna nga shtëpia, për të zvogëluar rrezikun e infektimit, por dhe për të ngadalësuar përhapjen e COVID-19”,- thuhet në këtë raport.
Kur puna në distancë nuk është e mundur, ekspertët këshillojnë se, duhen përforcuar masat e sigurisë për mbrojtjen e shëndetit të punonjësve dhe reduktimin e rrezikut për t’u infektuar në vendin e punës.
Organizata Botërore e Shëndetësisë ka publikuar një udhëzues se, si duhet të veprojmë në vendin e punës, për të mbrojtur shëndetin e punonjësve.
Pastroni dhe dezinfektoni rregullisht sipërfaqen e tryezës së punës, ekranit të telefonit apo tastierën e kompjuterit, respektoni distancën e sigurisë dhe mbani maskë kur nuk është e mundur të ruhet distanca.
/Burimi: Wired/Përshtati: Iconstyle.al/
