Për herë të parë, studiuesit kanë renditur efektet anësore të antidepresantëve më të përdorur, duke zbuluar ndryshime të mëdha në ndikimin e tyre tek pacientët, nga shtimi në peshë deri te rrahjet e zemrës dhe presioni i gjakut.
Studiuesit nga King’s College London dhe Universiteti i Oksfordit analizuan 151 studime që përfshinin mbi 58,500 pacientë dhe 30 ilaçe të ndryshme kundër depresionit. Ata vëzhguan efektet gjatë tetë javëve të para pas fillimit të trajtimit, periudha më e ndjeshme për trupin dhe mendjen.
Rezultatet, të publikuara në revistën prestigjioze “The Lancet”, tregojnë dallime të mëdha mes barnave. Disa pacientë shtuan deri në 2 kilogramë në peshë, ndërsa tek të tjerë u vu re një ndryshim deri në 21 rrahje zemre në minutë.
Në Mbretërinë e Bashkuar, rreth tetë milionë persona përdorin aktualisht antidepresantë një numër që thekson rëndësinë e përshtatjes së trajtimit për secilin individ.
Dallime të theksuara mes barnave
Sipas studimit:
- Agomelatina shkaktoi një rënie në peshë prej 2.4 kg, ndërsa maprotilina lidhej me një shtim prej gati 2 kg.
- Ndërmjet fluvoksaminës dhe nortriptilinës u vu re një ndryshim prej 21 rrahjesh në minutë në rrahjet e zemrës.
- Presioni i gjakut ndryshonte deri në 11 mmHg midis nortriptylinës dhe doxepinës.
“Është e qartë se asnjë ilaç kundër depresionit nuk është i njëjtë,” shpjegon Dr. Atheeshaan Arumuham nga King’s College London. “Këto ndryshime mund të akumulohen dhe të ndikojnë klinikisht, duke rritur rrezikun e atakut në zemër ose goditjes në tru.”
Nuk duhet ndalur trajtimi pa këshillim mjekësor
Ekspertët theksojnë se rezultatet nuk duhet të frikësojnë pacientët, por të ndihmojnë mjekët dhe individët të marrin vendime më të informuara.
“Dua që njerëzit ta shohin këtë si fuqizim, jo si paralajmërim,” – tha Dr. Toby Pillinger për BBC Radio 4. “Është momenti që pacientët të përfshihen më shumë në vendimmarrje së bashku me mjekun e tyre.”
Një trajtim për çdo individ
Shembujt hipotetikë të përfshirë në studim tregojnë se:
- Sarah (32 vjeç) dëshiron të shmangë shtimin në peshë.
- John (44 vjeç) ka tension të lartë gjaku.
- Jane (56 vjeç) vuan nga kolesteroli i lartë.
Edhe pse të tre kanë të njëjtën diagnozë, mjekimi ideal për secilin do të ndryshojë. Kjo tregon rëndësinë e personalizimit të trajtimit për të minimizuar efektet anësore dhe për të maksimizuar suksesin e terapive.
Prof. Oliver Howes përmblodhi zbulimet:
“Ka dallime të mëdha midis antidepresantëve, dhe kjo është thelbësore për miliona njerëz që i përdorin. Edhe ndryshimet e vogla mund të kenë ndikim të madh në nivel popullate.”
Ky studim vë në dukje nevojën për kujdes të personalizuar, ndjekje të vazhdueshme mjekësore dhe bashkëpunim të ngushtë midis pacientëve dhe mjekëve, për të gjetur terapinë që funksionon më mirë për secilin rast.
