Përpara se të nisnin ditën e 12-të të protestës, studentët u kujdesën që fillimisht të pastronin Bulevardin ku kanë qëndruar prej disa ditësh. Ata kishin marrë kova me ujë dhe nisën të fshinin dhe lanin pjesën e Bulevardit përpara Kryeministrisë.
Studentët vijojnë të kërkojnë plotësimin e 8 kërkesave pa dialog. Ata duan që kjo protestë të jetë e pastër, pa asnjë ngjyrim politik.
“Askush nga studentët nuk e do që kjo protestë të marrë ngjyrim. Nuk duam partitë”, tha një nga protestuesit për “News24”.
Studentët kanë paralajmëruar protestë masive të hënën me pjesëmarrjen edhe të qytetarëve. Sakaq, studentët e fakultetit Ekonomik kërkuan dorëheqjen e dekanit Dhori Kule me pretendimin se nuk i ka pritur në takim për të diskutuar problematikat, ditën e djeshme.
Ndërkohë, që kryeministri Edi Rama i lutet të rinjve të dialogojnë.
