Kryeministri Edi Rama është i ftuar mbrëmjen e sotme në emisionin “Opinion” për të diskutuar në lidhje me protestën e studentëve. Në minutën e parë të emisionit, moderatori Blendi Fevziu shfaqi në ekran historitë e trishta të studentëve, të cilët tregonin se punonin 2-3 punë për të përballuar tarifën e Universitetit, pasi prindërit e tyre ishin të papunë. Kreu i qeverisë u përgjigj se kjo është një situatë që ndodh kudo në botë, madje edhe vajza e tij ka punuar si recepsioniste gjatë studimeve jashtë Shqipërisë.
“Duke qënë prind vetë, po kujtoj se vajza jonë kur shkoi me studime jashtë vendit, punoi turni i tretë recepsioniste për të mbuluar një pjesë të shpenzimeve. Kështu është kudo” – u përgjigj kryeministri.
Sakaq, Rama nënvizoi se nuk i ka cilësuar protestuesit si ngelës.
“Unë nuk kam bërë deklaratë për studentë ngelës. Kam bërë një koment, ku kam folur për tarifën e mbetësave dhe jo për protestuesit.” – tha ai.
Dhjetëra studentë vijojnë të qëndrojnë përpara dyerve të Kryeministrisë, duke kërkuar miratimin e tetë pikave.
