Studentët vijojnë me protestën e tyre që sot ka marrë një tjetër drejtim.
Ata janë ngujuar brenda fakultetit Juridik në Tiranë dhe kanë bllokuar hollin dhe derën e jashtme, ndërsa shprehen të vendosur të qëndrojnë deri të dielën brenda fakultetit.
“BalkanWeb” raporton se studentët do të vijojnë ngujimin deri në fundjavë. Ata kanë bërë të ditur se ngujimi i tyre do të jetë deri të dielën, ndërsa pas kësaj ata do të thërrasin një protestë mbarëkombëtare në mbështetje të tyre.
Ndërkohë, ditën e sotme studentë të fakultetit të Drejtësisë në Tiranë, në bashkëpunim me studentë të fakultetit të grupeve të ndryshme u vendos paraqitja e kërkesave pranë dekanatit.
Kërkesat vijojnë si më poshtë:
1- Shtyrja e sezonit dhe procesit mësimor deri në dhënien e një përgjigjeje përfundimtare.
2- Shtyrja e afatit të pagimit të tarifave dhe shtyrja e procedurave për marrjen e bursave deri në dhënien e një përgjigjeje përfundimtare.
3- Nisja e një plan veprimi nga dekanati, për plotësimin e kërkesave që varen drejtpërdrejt nga ai.
4- Mospenalizimi i studenteve apo marrja e masave ndaj tyre, deri në përfundimin e bojkotit.
