Ministria e Arsimit ka reaguar sot me një urdhër të ri sa i përket peticionit të firmosur nga studentët e Fakultetit të Ekonomisë në Universitetin e Tiranës ditën e djeshme, ku kërkojnë tërheqjen e diplomave.
Sipas tyre, Fakulteti i Ekonomisë nuk i ka dërguar listën e studentëve të regjistruar në vitin 2017 Rektoratit por Qendrës së Shërbimeve Arsimore, megjithatë kjo e fundit ia ka vënë në dispozicion emrat e studentëve të regjistruar.
Si pasojë përplasjeve mes dekanit të këtij institucioni, Dhori Kule dhe rektorit të Universitetit të Tiranës, Mynyr Koni, studentët kanë 1 vit pa diplomë.
MASR ka kërkuar nga Universiteti i Tiranës që të lëshojë menjëherë diplomat e studentëve. Sipas tyre matrikullimi nga Qendra e Shërbimeve Arsimore ka qenë konform ligjeve në fuqi dhe nuk ka arsye për vonesa.
“Ministria e Arsimit, Sportit dhe Rinisë (MASR), pasi u njoh me problematikën e mos-lëshimit të diplomave të studentëve të Fakultetit të Ekonomisë (UT), përmes një shkrese të ministres ka kërkuar që UT të lëshojë menjëherë diplomat e studentëve. Studentët kanë shlyer të gjitha detyrimet dhe matrikullimi i tyre nga QSHA ka qenë konform ligjeve dhe akteve në fuqi, kështu që nuk ka asnjë arsye për vonesat e shkaktuara nga UT. MASR nënvizon se e drejta e studentëve prevalon mbi çdo mosmarrëveshje të brendshme të UT që ka shkaktuar këtë vonesë të papranueshme në diplomimin e studentëve. Gjithashtu, bëhet me dije se nga ana e Rektorit të Universitetit të Tiranës janë nënshkruar disa nga diplomat, që numrat e matrikullimit të studentëve janë lëshuar me të njëjtën procedurë sikurse ajo e kundërshtuar nga Rektori i UT, i cili është një veprim selektiv dhe në kundërshtim me kuadrin ligjor në fuqi. Përfundimisht, MASR kërkon pajisjen e studentëve që kanë shlyer të gjitha detyrimet akademike me diplomat përkatëse, menjëherë”, njofton Ministria.
Kule i kishte dërguar listat e studentëve tek Qendra e Shërbimeve Arsimore por jo te rektorati dhe për këtë arsye Koni nuk ka fimosur. Si pasojë e këtij konflikti mbetën pa diploma 315 studentë të cilët do t’i drejtohen gjykatës në të kundërt.
