Studentët e Fakultetit të Ekonomisë në Universitetin e Tiranës ditën e sotme kanë zhvilluar një takim me përfaqësuesit e Rektoratit, të cilit i kanë dorëzuar një peticion me 150 firma, ku kërkojnë tërheqjen e diplomave.
Sipas tyre, Fakulteti i Ekonomisë nuk i ka dërguar listën e studentëve të regjistruar në vitin 2017 Rektoratit por Qendrës së Shërbimeve Arsimore, megjithatë kjo e fundit ia ka vënë në dispozicion emrat e studentëve të regjistruar.
Si pasojë Rektorati i kërkon QSHA-së që të rinisë procedurën, edhe pse institucioni e ka bërë njëherë procedurën e dërgimit të listës.
“Ajo që kërkojmë është që të na vendosë në dispozicion dokumentacionin. Në 2017 kur janë regjistruar në Fakulteti Ekonomik, FE duhet t’i përcillte listën Rektoratit, por nuk ka ndodhur kështu. Pra studentët kanë numra matrikullimi, nota. Dje morëm vesh se Rektorati ka kthyer diplomat dhe zgjidhja është shumë e thjeshtë. Ka studentë këtu me kredi dhe me halle dhe duan vetëm diplomat. Të pajisen me diploma para se t’i drejtohemi Gjykatës dhe prokurorisë,” tha njëri nga studentët.
Ndërsa drejtori i kurrikulës në UT, Albano Zhapaj është shprehur se i është dërguar një shkresë Ministrisë së Arsimit, e cila sipas tij ka në dorë zgjidhjen e këtij problemi.
“Unë po i dorëzoj avoktatit të studentëve, një kërkesë Ministrisë së Arsimit që është hartuese e udhëzimit. Ministria e Arsimit ka zgjidhjen në dorë. Ka dy zgjidhje. Në rast se sot dekani i FE dërgon listat e studentëve atëherë zgjidhja është e menjëhershme.’’- tha Albano Zhapaj.
Nga ana tjetër, avokati i studentëve ka folur për mediat e pranishme pas takimit dhe ka dhënë 10 ditë afat për vënien në dispozicion të ‘kartonave’, ndryshe ka paralajmëruar se do t’i drejtohen Prokurorisë.
