Studentët në fillim të vitit shkollor 2022 kërkuan rimbursim prej 100 eurosh në muaj si pasojë e krizës dhe inflacionit, por kjo kërkesë nuk u plotësua si të gjitha kërkesat e tjera që ata i kanë paraqitur qeverisë që nga protesta e studentëve në vitin 2018 e deri më tani.
Në fillim të këti vitit shpresonin të ishin pjesë e paketës së luftës kundër inflacionit që do të shpërndahej nga qeveria, por sërish të zhgënjyer rikthehen në auditor.
“Nuk e di pse jo studentët? Ishim të vetmit që u përjashtuan nga pakoja e madhe. Më erdhi shumë keq, ne jemi e ardhmja. Shumë prej nesh nuk punojnë dot për shkak të studimeve, shpenzimet janë të larta. Jemi shtresa më e prekur. Një ndihmë sado e vogël do ishte mirë”. – shprehet nje student
Por protestat e pedagogëve për dyfishimin e pagave dhe investimin ne shkencë nuk janë lënë pas me vitin e shkuar, por Sindikata e Punonjësve të universiteteve ka paralajmëruar se do të bojkotojnë sezonin e provimeve nëse zëri i tyre nuk dëgjohet nga qeveria.
“Nuk kam shpresa se do ndryshojë gjë për 2023. Sindikata do marrë vendim. Investimi në shkencë është zero, duhet më shumë investim”, – shprehet nje pedagog.
Nga ana tjetër, studentët shprehen se qëndrojnë krah kërkesave të akademikëve, por nuk dakordësohen për bllokimin e testimeve.
