Temperaturat e ngrohta të ditëve të fundit na kanë bërë të harrojmë se jemi në stinën e vjeshtës dhe duhet të bëjmë ndryshime në gardërobën tonë.
Megjithatë jemi ende në kohë të zgjedhim ata aksesorë apo veshje që do të jenë trendi i këtij sezon. Për t’ju ardhur në ndihmë bëni mirë të ndiqni rubrikën e “iconstyle.al” për aksesorët ose veshjet më ‘must’.
Javën e kaluar për “iconstyle.al” Armina Mevlani tregoi 3 trendet e saj të preferuar dhe ato ishin: Xhaketat oversive, xhinset me shtrat të lartë dhe pardesy.
Ndërsa në rubrikën e kësaj jave do të sjellim këshillat e një prej blogereve më me stil shqiptare, Sarah Berisha.
Sarah ka treguar për ne 3 veshjet dhe aksesorët e saj të preferuar për stinën e vjeshtës dhe jemi të sigurtë se nëse do i vishni do merrni komplimente pafund.
Çizmet e gjata të lëkurës
Çizmet e gjata mbi gju janë një dashuri e vërtetë dhe të nxjerrin gjithmonë nga situata. Ato janë cilësuar si çizmet më “in” të sezonit dhe sipas Sarës nuk duhet të mungojnë në gardërobën tonë.
Bereta
Kapelja emblemë e stilit francez është kryefjala e aksesorëve të kësaj vjeshte. Një e kuqe klasike nuk njeh kohë, por edhe modelet e dekoruara apo ato me printe janë një super zgjedhje për t’i dhënë një dozë të fuqishme stili look-ut tuaj.
Pallto ngjyrë camel
Cilido qoftë stili juaj, tek palltoja ngjyrë camel do të gjeni një aleate perfekte për këtë sezon. E përkryer për t’u kombinuar me veshje formale, me fustane dhe funde elegante, por shumë moderne edhe me një pulovër, me një palë xhinse dhe atlete me ngjyra.
