Detajet e para për emisionin që do të prezantonte Marina Vjollca në Tv Klan i mësuam pak javë më parë: Të ftuarit e saj nuk do të flisnin më për sportin.
Ndërsa ishim mësuar ta shikonim moderatoren shqiptare krah Manushit në “Procesi Sportiv”, tani do të mësohemi ta shohim atë në një tjetër studio, ku do të flitet për muzikën.
Sipas formulës kryesore të emisionit të ri do të garojnë në çift një këngëtar profesionist me një tjetër personazh, për të zgjedhur më pas se cili është dueti më i mirë i realizuar.
Megjithatë, Marina dhe realizuesit e spotit të “C’est la vie” kanë menduar se nuk është e nevojshme të zbulojnë shumë prej programit pasi e rëndësishme është që t’i bëjnë të njohur publikut se Marina ka hequr dorë një herë e mirë nga emisionet sportive.
Dhe këtë me një detaj shumë të kuptueshëm!
Moderatorja shfaqet në spot duke fjetur, por alarmi, më pas papagalli dhe zhurma e komentimit të një ndeshjeje e zgjon dhe fill pas këtij momenti Marina i hedh një jastëk televizorit duke e prishur.
Në këtë mënyrë moderatorja hedh pas krahëve të shkuarën, ndoshta për të mos u kthyer më. Por nuk i dihet, pasi jeta është e gjatë!
Burimi: Instagram
