Spikerja e lajmeve në “Zjarr Tv”, Greta Hoxha ishte dje e ftuar në emisionin “Pasdite në Top Channel” nga ku foli për eksperiencën e saj në televizion. E bindur se ka thyer tabutë në Shqipëri, Greta e cila jep lajmet pa reçipeta, ka thënë se kjo formë nuk e ka penalizuar, por përkundrazi e ka ndihmuar të arrijë atë që dëshiron.
“E dashuroj gazetarinë, Kam profesionin e juristes, por pas të 30-ve do e ushtroj këtë profesion. Kur mora ftesën për tek ‘Zjarr TV’ isha e re dhe u përshtata fillimisht tek emisioni i mëngjesit. Lajmet i jepja vetëm në fundjavë. Unë jam e kënaqur. Ne kemi sjellë diçka të re. Formati i prezantimit të lajmeve ‘topless’ bëri bujë në media. Ndjehem krenare. Puna që unë bëj nuk më ka penalizuar, por më ka ndihmuar për të arritur atë që unë dua. Të gjitha vajzat e ekranit dalin me dekolte të tepruara, dhe një gjë e tillë nuk duhet të paragjykohet. Unë kam thyer tabu dhe kam sjellë revolucion në Shqipëri. Ndryshe nga këto vajza që zhvishen unë nuk bëj vetëm këtë, unë gjithashtu di të moderoj dhe të bëj gazetari. Unë e kam pasion televizionin dhe ftesën e ‘Zjarr TV’ e pranova me kënaqësi”, tha gjithë krenari Greta.
Spikerja e lajmeve tha ndër të tjera se ka provuar të bëhet pjesë edhe e ekraneve të tjera, por nuk ka mundur për shkak të miqësive apo njohjeve që funksionojnë në ekranet e mëdha. Pavarësisht kësaj ajo shprehet e bindur në vazhdimin e modelimit “topless” pavarësisht paragjykimeve, pasi çdo gjë që paragjykohet, shitet.
“Nuk mund të paragjykohemi nga njerëzit e ‘moralshëm’ të cilët jetën e tyre e kanë të mbushur në gabime. Ne jemi të veçantë, nuk kemi kopjuar askënd. Kam marrë oferta edhe nga mediat e huaja, por nuk pranova sepse kishte disa çështje teknike që nuk mund të realizoheshin. Për mënyrën tonë të prezantimit kemi marrë komente edhe nga të huajt. Kemi pasur në studio edhe politikanë të cilët nuk u ka bërë përshtypje fare paraqitja jonë. Prezantimi i lajmeve me dekolte të hapur është diçka e re, u paragjykua në fillim por tashmë janë mësuar. S’ka asgjë negative. Pjesa e paragjykimeve në vendin tonë është e lartë. Çdo gjë që paragjykohet shitet”, tha Greta.
