Ditën e sotme dy kombëtaret shqiptare të futbollit, ajo e Shqipërisë dhe ajo e Kosovës u përballën në një vëllazërore të luajtur në “Elbasan Arena”, ku ndeshja përfundoi me rezultatin 2-1 të kuqezinjve të Rejës.
Për kombëtaren e Shqipërisë shënoi Bekim Balaj dhe Myrto Uzuni, teksa Vedat Muriqi, nga pika e bardhë e penalltisë, shkurtoi rezultatin për dardanët.
Ndonëse tifozët nuk ishin të pranishëm në stadium emocionet e transmetuara nga kjo ndeshje ishin të mëdha.
Sakaq, në rrjetet sociale e para ekranit të televizorit të gjithë brohoritën njëzëri për të tre golat e shënuar.
Por, nuk ka qenë kjo nata më e mirë për sulmuesin e Kosovës, Edon Zhegrova, i cili është përballur me disa pakënaqësi e kritika.
Duket se futbollisti nga Prishtina nuk e ka marrë kënaqësinë e kësaj ndeshje nga vetë fakti se disa media e fansa e kanë kritikuar për paraqitjen e tij mbrëmjen e sotme.
Megjithatë, i riu nuk ka qëndruar në heshtje, përkundrazi. Me anë të një statusi në Instastory, Edoni shkruan se e di se përse kanë kaq urrejtje disa persona, por ama shton me vendosmëri se askush nuk do mund ta ndalë atë.
Më tej, i riu shkruan se nuk e mendoi dy herë nëse duhet ta pranonte ftesën për të qenë pjesë e Kombëtares së Kosovës apo jo, dhe se nëse do kishte dhënë përgjigje negative do e kishin quajtur “tradhëtar.
Në fund e mbyll me një fjali “T’du Kosovë!”.
Zhegrova debutoi për herë të parë me skudarën përfaqësueses kosovare të futbollit në miqësoren më datë 24 mars 2018 kundër kombëtares së Madagaskarit ku arriti të shënojë gol në debutim në minutën e 48′ me një goditje nga distanca.
Nga ai moment ai ka qenë një lojtar kyç i Kosovës dhe është parë si një talent i ri e mjaft premtues, madje është cilësuar edhe si “Messi i Kosovës.”
