Ditën e sotme opozita do të dorëzojë në SPAK një padi për inceneratorët. Njoftimi u bë nga Kreu i Partisë Demokratike, Lulzim Basha, gjatë një interviste televizive.
‘Brenda ditës së sotme në SPAK do të dorëzohet një padi për inceneratorët. Një shumë e madhe e parave kanë shkuar te inceneratorët. Kjo është arsyeja pse çështja e inceneratorëve ka dominuar diskursin tonë politik. Nuk erdhëm rastësisht këtu. Qeveria nuk ia kaq dhënë këto para qytetarëve, por inceneratorëve. Vetëm javën e kaluar janë paguar 2 milion euro, që mund t’u jepeshin qindra familjeve të varfra, mijëra pensionistëve ’- deklaroi Basha.
Kryetari i Partisë Demokratike, Lulzim Basha akuzoi kryeministrin Edi Rama se ka ndarë 400 milionë euro nga taksat e qytetarëve për ndërtimin e impianteve të trajtimit të mbetjeve. Basha tha se qeveria është e kapur nga mafia e plehrave, dhe shkoi më tej duke thënë se do të shkarkohet kryebashkiakja e Durrësit që të firmosë Milva Ikonomi në vend të saj, shkresën që i hap rrugën “vjedhjes së parave”.
Akuzave të opozitës se janë dhënë para për inceneratorin e Fierit i cili nuk ekziston, u është përgjigjur një ditë më parë, ministri i Turizmit, Blendi Klosi. Ai ishte në Fier dhe tha se kompania është brenda kontratës. Sipas tij, investimi përfundon në Dhjetor dhe 4 vjet më pas impianti do t’i kalojë Bashkisë.
“Brenda 7 viteve që ka jetën ky incenerator për t’i kaluar pastaj bashkisë pra koncesioni është për 7 vjet dhe 3 vjetët e para janë për të ndërtuar impiantin dhe 4 vite për të bashkëpunuar kompania me bashkinë për të gjetur mënyrën e menaxhimit për të grumbulluar të gjithë mbetjet nga i gjithë qarku në këtë impiant dhe pastaj impianti i kalon përfundimisht bashkisë”.
I shoqëruar edhe nga kryebashkiaku i Fierit, Klosi tha se ky do të jetë një investim modern dhe se vonesat kanë qenë për arsye që tashmë dihen.
“Ju i dini problematikat e zonës, këtu kemi zgjedhur një vend të ri që është kthyer në një landfill super modern dhe shumë shpejt do të jetë real dhe i domosdoshëm”, sqaroi ministri.
/GazetaReforma.com/
