Shumë personazhe të njohur të botës së artit apo të politikës në vendin tonë që sot spikasin në fushat e tyre, dikur kanë studiuar për profesione të tjera. Disa prej tyre i kanë praktikuar në fillimet e tyre profesionet për të cilat kanë studiuar, ndërsa disa të tjerë nuk e kanë pasur fatin.
Fama që iu dha ekrani televiziv apo dhe zhanre të tjera i bënë që të hiqnin dorë nga profesionet e tyre të para. Për ta mund të themi me plotë gojë se pasioni i ka mposhtur vitet e studimeve dhe sot ata shkëlqejnë në fusha të tjera.
Armina Mevlani sot është një blogere dhe sipërmarrëse e njohur, por kujtojmë se ka mbaruar studimet në fakultetin e Shkencave Sociale, dega Filozofi.
Sali Berisha është një ndër politikanët më të njohur shqiptar, i cili dikur ka mbaruar studimet në Fakultetin e Mjekësisë dhe është specializuar në kardiologji. Në fillimet e tij të para ka punuar si mjek, por me hyrjen e demokracisë ai u bë kryetari i Partisë Demokratike dhe për vite të tëra ka qeverisur shqiptarët.
Sonny K Elson, fotografi i njohur shqiptar vetëm pak kohë më parë zbuloi se ka studiuar për infermieri, por pasioni për fotografinë e bëri ta braktiste këtë profesion.
“Shkova në Itali në vitin 1992 pasi fitova një bursë studimi pasi mbarova gjimnazin. Ishim 33 nxënës. Pasi bëra një vit për infermier, kuptova që nuk ishte shkolla e duhur për mua. E lash dhe më këshilluan fizioterapinë, kuptova që nuk duroja dot spitalet. Më mirë thash të bëj foto të duroj ‘pjeshkat'”, është shprehur Sonny K. Elson me humor në një intervistë të dhënë pak kohë më parë për “Icon”.
Adi Krasta sot është një ndër moderatorët më të vlerësuar të ekraneve shqiptare, por dikur nën shtysën e prindërve ka studiuar për Kimi në Fakultetin e Shkencave të Natyrës. Pavarësisht përpjekjeve për të plotësuar dëshirën e prindërve Krasta e kuptoi se ky nuk ishte profesioni i tij dhe kaloi drejt gazetarisë, një profesion në të cilin ka shkëlqyer ndër vite.
Elvana Gjata e ftuar në emisionin “Xing me Ermalin” pak ditë më parë zbuloi se ka studiuar për regji megjithëse nuk e ka praktikuar asnjëherë këtë profesion.
Luana Vjollca ka studiuar për drejtësi ndërsa sot është një ndër moderatoret më të suksesshme.
Kryeministri Edi Rama ka studiuar për pikturë, ndërsa prej vitesh i është futur botës së politikës, megjithëse nuk e lë pas dore as pasionin për pikturën.
Turjan Hyska ka mbaruar Fakultetin e Shkencave Sociale në degën Shkenca Politike, por prej vitesh i është futur botës së televizionit si gazetar e moderator.
Soni Malaj është diplomuar për gjuhë të huaja për degën frëngjisht në profilin “Përkthim”, një profesion të cilin nuk e ka praktikuar. Suksesi në muzikë e bëri që të heq dorë nga profesioni për të cilin ka studiuar.
Jerida Sakaj moderatorja e emisionit të “Klubit të Mëngjesit” ka përfunduar në “Akademinë e Arteve” për “Regji filmi dhe televizioni”, por ajo që nuk dinim është se studimet e para të larta i ka kryer për “Fizikë”.
“Kur i tregova Drejtorit të Informacionit se isha arsimuar për ‘Fizikë’, nisi të qeshte. Më pyeti se çfarë kanë të përbashkët fizika dhe gazetaria. Ju përgjigjja se kanë një të përbashkët: të vënë të dyja trurin në punë gjatë gjithë kohës”, ka thënë në një intervistë Jerida.
Burimi: Iconstyle.al
