Me 16 qershor të vitit 1971, lindi një nga figurat më të mëdha të historisë së hip-hop-it dhe jo vetëm, Tupac Amaru Shakur. Edhe pse jeta e tij u ndërpre tragjikisht në moshën 25-vjeçare, ndikimi i tij vazhdon të ndihet fuqishëm në kulturën urbane, politikën sociale dhe muzikën bashkëkohore.
Tupac nuk ishte thjesht një reper – ai ishte poet, aktor, aktivist dhe zëri i një brezi të tërë që luftonte për drejtësi, barazi dhe të vërtetën. Tekstet e tij shpesh ishin rrëfime të sinqerta për realitetin brutal të jetës në geto, për dhimbjen, dashurinë, por edhe për shpresën.
“Changes”, “Dear Mama”, “Keep Ya Head Up”, “Hail Mary” janë vetëm disa nga këngët që mbeten himne të brezave të tërë, duke kaluar kufijtë e kohës dhe vendit.
Edhe pas vdekjes, emri i tij vazhdon të jetë legjendë. Ka pasur filma, dokumentarë, murale, libra dhe teori të pafundme komploti por një gjë është e sigurt: Tupac jeton në çdo fjalë që frymëzon guxim dhe vetëdije.
