15 nëntori është Dita Botërore e kujtimit të viktimave të trafikut rrugor.
Përgjatë vitit 2021 në Shqipëri kanë ndodhur 13.4% më shumë aksidente se në periudhën e njejtë të vitit 2020.
Më 25 qershor, një familje me 4 anëtarë humbi jetën në autostradën Fier – Vlorë. Më 26 gusht, një furgon ra në greminë pasi një makinë i preu rrugën dhe 5 persona humbën jetën.
Aksidente me fatalitet janë shënuar edhe gjatë këtij muaji.
Më 11 nëntor si pasojë alkoolit, shpejtësisë dhe kalimit në semafor të kuq, 2 aksidente ndodhën brenda pak orësh në rrugën e Kavajës në Tiranë – një me dy viktima dhe një tjetër me plagosjen e një tjetri.
Qytetarët thonë se kanë frikë të kalojnë rrugën, të shqetësuar nga aksidentet.
“Nuk merret vesh se çfarë bëjnë. As nuk respektojnë vizat e bardha – as këmbësorët as shoferët”, thotë një qytetar.
“Çdo gjë është jashtë kontrollit”, tha një qytetar tjetër.
Të dhënat e INSTAT tregojnë se deri në shtator të vitit 2021 kanë ndodhur 13.4 % më shumë aksidente rrugore se gjatë të njëjtës periudhë kohore të vitit 2020.
1,024 aksidente me 151 të vdekur, kryesisht meshkuj, janë shënuar gjatë 9 muajve të 2021.
Statistikat tregojnë se janë drejtuesit e mjetit ata që shkaktojnë kryesisht aksidentet.
Tirana dhe Lezha janë qarqet ku kanë ndodhur më së shumti aksidente rrugore, të shkaktuara kryesisht nga shoferë të moshave 25- 34 vjeç.
/EuroNews
