Pritja e kampiones shqiptare Luiza Gega në aeroportin e Rinasit nga disa fansa dhe një limuzinë për të cilën u tha se u bë vetëm “për show”, i ka revoltuar dy këngëtaret shqiptare, Soni Malaj dhe Aurela Gaçe.
Në një postim në “Instagram”, Soni Malaj, e cila shprehet se e ka njohur publikisht kampionen, shkruan se ndihet e zhgënjyer për mënyrën se si është pritur ajo. Ndër të tjera, Soni shpreh habi për faktin pse bëhen dallime kaq të mëdha mes futbollit dhe atletikës, ndërkohë që sportistët, të ҫdo fushe, janë ambasadorët më të mirë të një shteti.
Shqetësimit të Sonit i është bashkuar edhe Aurela Gaçe e cila ka rishpërndarë statusin e saj duke qenë në të njëjtë ide me kolegen.
“Dje po ndiqja lajmet dhe kudo pasqyrohej zhgënjimi i nënkampiones së Europës, atletes shqiptare, Luiza Gega, me autoritetet qeverisëse shqiptare, të cilat nuk e takua për ta uruar për arritjen e saj, për t’i shprehur mirënjohje. Luiza nuk kishte as një uniformë zyrtare nga federate gjatë momentit të marrjes së medaljes. Unë kam pasur rastin ta takoj këtë sportiste të mrekullueshme, e cila po na nderon gjithnjë e më tepër dhe kjo, falë punës dhe stërvitjes së saj të palodhur. Sportistët janë ambasadorët e një shteti, pse bëhen këto dallime kaq të mëdha nga atletika tek futbolli? Krenare me ty Luiza Gega, jam e sigurt që ti do marrësh edhe shumë medalje të tjera”, shkruan Soni në “Instagram”.
