Edhe pse shumë prindër në Shqipëri e shohin teknologjinë si një shpërqendrim për fëmijët e tyre, mësimi online është mënyra më e mirë për ta përdorur teknologjinë në avantazhin tonë.
Dhe pikërisht, në kohën kur kishim më tepër nevojë për teknologjinë në periudhën e karantinimit, mësimi online doli të ishte zhgënjyes për shumë nxënës e prindër shqiptarë.
Për nxënësit nuk u përmbushën pritshmëritë për të marrë njohuritë që merrnin kur ishin në shkollë, ndërsa prindërve u ra si peshë e rëndë fakti që duhej të merreshin me fëmijët e tyre, t’i largonin ata nga shpërqendrimi i teknologjisë, në një kohë që mund të ishin vetë në punë.
Aksesi në internet, që jo gjithkush e ka, ngarkesa e madhe, mungesa e gjithëpërfshirjes, programe jo efektive ku ka shkëputje etj, janë disa nga arsyet për pakënaqësinë e madhe që u krijua pas karantinës për mësimin online.
Këto pakënaqësi duhej të ishin zgjidhur tani që jemi në prag të vitit të ri akademik, por në fakt ndodhi e kundërta. Ministria vendosi rikthimin në shkolla dhe e justifikoi këtë vendim me pakënaqësitë e krijuara prej mësimit online.
Ndaj ne kemi krijuar një sondazh për të kuptuar se çfarë vështirësi u hasën gjatë karantinës me mësimin online dhe çfarë pritet të ndodhë në vijim me rikthimin në shkolla!
