Asistentja e Arjan Çanit, Sofia, emri i vërtetë i së cilës është Xheni Brahaj, ka qenë e ftuar dje në emisionin “Rudina” në TV Klan. Ajo ka rrëfyer jetën e saj para dhe pas punës pranë Çanit.
Karriera e saj në televizion ka nisur më herët nga sa e kemi menduar. Ajo ka qenë pjesë e trupës së baletit të Albi Nakos në TV Klan. Baleti ka qenë dhe është pasioni i saj më i madh, të cilin e ka nisur që në moshën 10-vjeçare.
Xheni ka treguar edhe rastësinë e bukur të njohjes së saj me Arjan Çanin.
“Unë kam qenë balerinë e trupës së baletit të “Tv Klan” dhe po bënim xhirimet e natës së Vitit të Ri, rastisa me Çanin edhe m’u bë oferta për të qenë pjesë e emisionit dhe që në momentin e parë që m’u bë, e pranova direkt me shumë kënaqësi ftesën”: tregon Sofia.
Televizioni ka qenë një nga ëndrrat e saja më të mëdha, por që nuk e kishte menduar se si dhe ku mund të gjendej.
“Gjithmonë e kam pasur dëshirë, por nuk e kam menduar dhe ka qenë vërtet një surprizë shumë e madhe që më ka ardhur në jetë.”: tha balerina.
Roli i Sofisë, Xhenit i pëlqen shumë, i duket komod, rol shumë i bukur, shumë pozitiv, “vetëm fjalë të mira kam për atë rol, për atë vend pune.”
Gjithashtu Xheni tregoi se ndihet e privilegjuar që punon me Arjan Çanin.
“Marrëdhënia me Çanin është shumë e mirë. Si koleg pune, si drejtues kam shumë marrëdhënië të mira dhe jam shumë e privilegjuar që punoj me të”: tha Xheni.
