Dy persona janë arrestuar në Rio de Janeiro në lidhje me një kërcënim të dyshuar me bombë në koncertin madhështor të Lady Gaga-s, që u mbajt të shtunën, më 3 maj, në plazhin Copacabana, raportojnë mediat ndërkombëtare.
Sipas “The Guardian”, një burrë dhe një adoleshent u ndaluan pak orë para koncertit të falas, nën dyshimin se po planifikonin një sulm me lëndë shpërthyese kundër komunitetit LGBTQ+ në Brazil.
Një përfaqësues i Lady Gaga-s, 39 vjeç, deklaroi për “The Hollywood Reporter” se këngëtarja nuk ishte në dijeni të asnjë kërcënimi deri sa lajmi u bë publik në media.
“Ne mësuam për këtë kërcënim të supozuar përmes raportimeve të medias këtë mëngjes,” thuhet në deklaratën e përfaqësuesit. “Gjatë gjithë organizimit dhe zhvillimit të koncertit, nuk pati asnjë sinjal apo komunikim nga autoritetet për ndonjë rrezik të mundshëm.”
Pavarësisht frikës, koncerti u zhvillua pa incidente, duke thyer rekorde: rreth 2.5 milionë njerëz morën pjesë në eventin në Rio – duke e bërë atë koncertin më të madh të ndjekur ndonjëherë nga një artiste femër në histori.
Në një konferencë për shtyp më 4 maj, Policia Civile e Rio-s sqaroi se të arrestuarit po punonin së bashku për të rekrutuar njerëz në koncert me qëllim sulme të koordinuara me bomba artizanale, duke përdorur kokteje Molotov. Sipas autoriteteve, sulmet synonin drejtpërdrejt publikun LGBTQIA+.
Personi i dyshuar si organizator është arrestuar për mbajtje të paligjshme armësh, ndërsa adoleshenti për posedim të materialeve pornografike me të mitur, pas një bastisjeje në 15 lokacione të ndryshme.
Një koncert historik që përfundoi me sukses, por që prapa skenave fshihte një skenar të rrezikshëm – i parandaluar në kohë nga inteligjenca braziliane.
