Në një kohë kur rastet e reja po rriten me shpejtësi të gjithë duam të dimë se çfarë do ndodhë më tej dhe cilat janë skenaret e qeverisë.
Disa ditë më parë në një konferencë për shtyp, ministrja e Shëndetësisë Ogerta Manastirliu, deklaroi se nëse do të ketë shtim të rasteve, do hapen edhe strukturat e tjera spitalore Covid.
Nga ana tjetër, duket se ekziston edhe një skenar i dytë që lidhet me kthimin e spitaleve rajonale të rretheve në spitale Covid.
Lajmi u bë publik paraditen e sotme nga zyrtarja e ministrisë së Shëndetësisë, Mirela Cami teksa ndodhej në qytetin e Shkodrës, e cila tha se nëse do ketë rritje të numrave mund të shfrytëzohen dhe spitalet rajonale.
“Për momentin kujdesi për të infektuarit jepet në spitalin infektiv COVID1, por nëse kemi rritje të numrave mund të shfrytëzohen dhe spitalet rajonale. Për momentin kemi vetëm spitalin Infekriv. Në varësi të situatës do të merren edhe vendime të tjera. Numri i tamponëve nuk vjen si mungesë por sipas rekomandimeve të epidemiologeve”, tha Cami.
Nga ana tjetër, drejtori i Spitalit të Shkodrës, Ardian Dajti u shpreh i gatshëm për të zbatuar vendimin e qeverisë.
“Lufta nuk ka mbaruar akoma, respektoni masat. Ne si drejtori nuk kemi ndryshuar asnjë masë, masat janë njësoj si në kohën e mbylljes, vazhdojmë të ndjekim të njëjtat masa. Sa i takon trajtimit të të prekurve ne kemi kapacitete por kjo varet nga vendimi i qeverisë, nëse qeveria vendos që të prekurit të trajtohen në spitalin rajonal ne do i përgjigjemi”, tha ai.
Kujtojmë se ditën e sotme u raportuan 78 raste të reja me Covid-19 dhe tashmë numri i personave aktivë me koronavirus është 894, teksa në spitalin Infektiv aktualisht po trajtohen 76 pacientë, 14 prej tyre janë në terapi intensive, ndërsa 2 janë të intubuar.
