20-vjetori i festivalit “Kënga Magjike” ka rezervuar shumë surpriza dhe nuk e kemi fjalën vetëm për artistët që do të ngjiten në skenë.
Por për teknologjinë më të fundit të njohur si “realiteti virtual” (VR), që përfshinë ndërthurjen e botës virtuale me atë reale.
Organizatorët e festivalit më të ndjekur të muzikës shqiptare paralajmëruan sjelljen e syzeve virtuale, përmes të cilave të gjithë ata që nuk mund të jenë të ulur në sallën e Pallatit të Kongreseve, mund ta shijojnë me të njëjtat emocione nga divani i shtëpisë.
“Këtë 20-vjetor festivali “Kënga Magjike” sjell një risi teknologjike. Për herë të parë në Shqipëri “livestream” në VR. Mund të përjetoni emocionet e skenës edhe nga shtëpia nëpërmjet realitetit virtual. Në kengamagjike.com në tvklan.al dhe në ëelcomealbania.com! Kënga Magjike po afron”, shkruhet në profilin e Instagram-it të festivalit.
Mësohet se aplikacioni “Welcome Albania” po bën të mundur sjelljen për herë të parë të një teknologjie të tillë për një festival shqiptar, falë kamerës 360 gradë 8K.
Si mund ta përjetoni emocionin sikur ndodheni aty?
Mjafton të blini një palë syze VR, që i gjeni në dyqanet e Tiranës dhe do të keni të njëjtën ndjesi sikur ndodheni të ulur në sallë, për të tre netët e festivalit.
Okej, ndoshta nuk do të donit t’i blinit një palë syze VR vetëm për të parë festivalin “Kënga Magjike”, ndaj “Welcome Albania” ka menduar që me to të shikoni vendet në të cilat nuk keni qenë kurrë më parë në Shqipëri.
Mjafton të shkarkoni aplikacionin, të vendosni syzet dhe do t’ju duket sikur po udhëtoni ju nëpër rrugët, malet apo bregdetin e bukur shqiptar.
Burimi: Instagram
