Ajo është një ndër vajzat e para shqiptare, që me këmbëngulje dhe përpjekje, pasionin për modelingun e ktheu në një profesion për veten. Sot Skandinada Lalaj ka zgjedhur të jetojë në Shtetet e Bashkuara të Amerikës, por nuk e ka braktisur këtë pasion.
Në një intervistë ekskluzive për “ICONstyle”, Skandinada shprehet se në krahasim me kohën kur ajo ushtronte modelingun, sot vajzat e reja kanë më shumë mundësi dhe kushte në Shqipëri dhe jashtë saj, mjafton “të kenë pasion dhe të mos thyen nga vështirësitë”.
Si një modele me eksperiencë, Skandinada tregon disa “sekrete të vogla” për ato vajza që kujdesen për trupin e tyre. Ajo jep këshilla edhe për ato që aspirojnë fotomodelingun. Sot, “Nada”, siç njihet në rrethin e saj shoqëror, jeton përkohësisht në SHBA, por ku e sheh veten pas 5 vitesh dhe ëndrrën e saj të madhe, e thotë për “ICONstyle”.
Intervista e plotë:
Skandinada, ju jeni larguar prej kohësh në SHBA. A u ndërpre karriera juaj e modelingut? Keni ndonjë peng, një gjë që nuk e realizuat në vendin tuaj…
Tashmë nuk është se jam e angazhuar me kohë të plotë, por part time, disa projekte të vogla po i vazhdoj ende. Pasi dhe angazhimet e mia janë më shumë pertej modelingut tani.
Me çfarë jeni e angazhuar aktualisht në SHBA? Përse u larguat dhe a ia vlejti për ty largimi nga Shqipëria?
Une jam larguar përkohësisht nga Shqiperia, kjo nuk ka të bëjë me braktisjen e vendit tim dhe as nëse ja vlejti apo jo. Jam e mendimit që njeriu duhet të vlerësojë mundësitë e mira në çdo vend që mund të ndodhet.
I ruani marrëdhëniet me shoqërinë tuaj? Flisni ende me Çiljetën, Fridën, Junën… dhe çfarë raporti keni me to tani që jeni larg?
Sigurisht që i ruaj marrëdhëniet, kurrsesi nuk mund të shkëputem nga shoqëria. Me Fridën, Çiljetën, Junën, Albën, Pejanën… Flas pothuaj çdo ditë, vetëm orari na ndryshon, asgjë tjetër nuk ka ndryshuar mes nesh. Shoqëria në jetën time është një familje e dytë.
Cili është regjimi juaj ditor, kujdesi për trupin, ushqimin… Çfarë bëni për të pasur një trup në formë?
Zgjohem rreth orës 8, pasi ha mëngjesin filloj aktivitetin e ditës. Tregohem e kujdeshme me ushqimin dhe pasditeve i kushtoj rëndësi ushtrimeve fizike. Sipas mundësisë së kohës ose shkoj në palestër ose dal për vrap nëse nuk kam mundësi.
Pa kë produkt bukurie nuk bën dot Skandinada…
Si çdo femër dhe unë kam një marrdhënie të fortë me produktet e bukurisë. Kam disa përzemër ose që s’mundem pa to, por pa të cilën nuk bëj fot është moisturizer (kremi hidratues për fytyrën).
Ju jeni një ndër modelet e para në Shqipëri. Sa e vështirë është për t’u bërë një modele në vendin tonë, për ta pasur atë si profesion?
Në kohën time ishte shumë e vështirë për të mos thënë e pamundur, por tashmë me vitet kanë ndryshuar dhe mundesitë. Për mua në fillim ishte thjesht pasion të cilin me përpjekje dhe këmbëngulje e ktheva në profesion për veten. E them këtë pasi fillova të përfitoj disa të ardhura nga projektet që organizoheshin dhe nuk është se e ndiqja më thjesht për qejf. Iu përkushtova edhe më shumë. Por sot ka më shumë mundësi për vajzat, veçanërisht jashtë kufijve të Shqipërisë sepse tek ne fatkeqësisht ende nuk ka një industri të mirfilltë mode që t’ju ofrojë më shumë punë, thjesht ka shumë pak sfilata personale të stilistëve ose projekte fotografike të disa revistave.
Cilat janë kriteret për t’u quajtur një modele sipas jush? A mund të na thoni ndonjë emër të një modeleje që po bën karrierë në Shqipëri…
Kriteret e një modeleje besoj njihen botërisht, nuk jam unë ajo që mund të gjykoj edhe pse te ne është abuzuar mjaft me fjalen “modele”. Sot në faqet sociale që ne ndjekim më shumë sheh “lloj e soj modelesh” të vetëquajtura të tilla. Me aq sa kam ndjekur dhe jam e informuar, ka disa vajza të sukseshme në botën e modeleve si Xhesika Berberi, Niki Deliorgji, Adrola Dushi…. U uroj vajzave edhe më shumë suksese.
Po një modele “idhull” e keni? Një emër…
Kam disa emra që më pëlqejnë si Linda Evangelista, Cindy Crawford, Naomi Cambell…
Çfarë këshille keni ju për ato vajza të reja që aspirojnë modelingun? Çfarë ju këshilloni të mos bëjnë në rrugëtimin e tyre?
E vetmja gjë që do të këshilloja unë për to, është që të ndjekin pasionin e tyre me vullnet e këmbëngulje deri në fund. Mos të thyhen nga pengesat dhe vështirësitë që të dalin rrugës. Sot mundësitë janë të shumta për ta realizuar këtë profesion jo më thjesht si “amatore” por si një modele profesioniste edhe ndërkombëtare, jo thjesht brenda Shqipërisë.
Ju keni realizuar një numër të madh fotografish nga profesionistë. Një këshillë për vajzat që e duan fotomodelingun…Si realizohet një foto e mirë…
Pas një fotoje të mirë fshihen orë të tëra pune, shumë shpesh e mendojmë kur shohim foto të bukura që lum si këto vajzat që bëjnë foto sa të thjeshtë e kanë (qesh). Por për realizimin e fotove duhet dhe një staf i mirë dhe profesionist në punën e tyre. Bashkëpunimi në grup është gjithmonë shumë i rëndësishëm në realizimin e një seti fotografik. E konsideroj veten me fat që gjithmonë kam pasur bashkëpunues profesioniste e të suksesshëm në realizimin e projekteve që kam bërë.
Cila është fotoja e fundit që keni realizuar ju me telefonin tuaj?! Qoftë edhe një selfie…
Një selfie me shoqen time, Galina nga Armenia.
A është Skandinada e dashuruar? Ku e shihni veten pas 5-10 vjetësh?
Sigurisht që jam e dashuruar, pa dashuri nuk do të mundja të jetoja. Është ndjenja që më motivon të realizoj jetën në mënyrën më të mirë të mundshme. Pas 5-10 vjetësh e shoh veten me një familje të madhe me fëmijë dhe e lumtur. Kështu si unë e shohin dhe shumë vajza të tjera, apo jo (qesh).
Burimi: ICONstyle
*Shfleto galerinë
