Skandali me inceneratorët është padyshim tema më e nxehtë e aktualitetit politik shqiptar, që fare mirë do të mund të kishte vijuar të kalonte në heshtje e i përmendur nga vetëm pak media, sikur të mos ishte për drejtësinë në Zimbabve (!!!), që nxorri zbuluar aferat korruptive që përfshijnë jo pak emra të rëndësishëm në Shqipëri.
Çfarë po ndodh me inceneratorët në Shqipëri?
Nevoja për menaxhimin mbetjeve urbane në vendin tonë duket se i hapi rrugën një afere të frikshme korruptive të përmasave masive që e ka zanafillën në vitin 2014, me tenderin pa konkurrentë për inceneratorin e Elbasanit, të fituar nga kompania “Albtek Energy sh.p.k.”, e themeluar nga Stela Gugallja vetëm pak kohë para tenderit.
Me një lehtësi për t’u pasur zili, kompania në fjalë brenda një kohe fare të shkurtër mori dritën jeshile nga qeveria shqiptare për një koncesion prej 22 milionë eurosh për inceneratorin që do të trajtonte mbetjet e Elbasanit e të disa zona përreth duke prodhuar energji elektrike.
Ndërsa në vitin 2016, një tjetër kompani e quajtur “Integrated Technology sh.p.k.” me pronar dhe administrator Klodian Zoton, në një tjetër garë pa konkurrentë, fiton tenderin për një tjetër incenerator prej 28 milionë eurosh, kësaj radhe në Fier. Për ironi të fatit, të dyja kompanitë listonin në QKB të njëjtën adresë fizike: zyrën 13/2 në godinën SKY Tower, siç ka raportuar “Exit.al”.
Një gjë e tillë nuk duket t’i ketë shqetësuar institucionet përgjegjëse, teksa afera thellohet edhe më tej në vitin 2017, me tenderin 128 milionë euro të inceneratorit të Tiranës. Fituese e këtij tenderi u shpall kompania “Integrated Energy B.V” me seli në Amsterdam.
Të dhënat e siguruara nga BIRN tregojnë se kompania e regjistruar në Holandë, në fakt zotërohet nga kompania shqiptare “Integrated Technology Services” sh.p.k si dhe kompanitë italiane “Paul Wurth Italia S.P.A” dhe “Energy Recuperator S.P.A.”. Pra emri i Klodian Zotos, jo rastësisht, shfaqet sërish.
Politika e media e përfshirë në skandal
Deri më tani, Stela Gugallja e “Albtek Energy” dhe Klodian Zoto i “Integrated Technology” janë dy emrat më të lakuar të kësaj historie. Por në të vëtetë, perosnazhi më i rëndësishëm sapo ka dalë në skenë. Bëhet fjalë për Klodian (Mirel) Mërtirin, i njohur gjithashtu si Ilir Dedja i cili është shpallur në kërkim në Zimbabve pas një skandali me tendera korruptivë me Ministrinë e Shëndetësisë në Zimbabve.
Mërtiri dyshohet të jetë emri pas të gjithë këtyre koncesioneve korruptivë, për shkak të lidhjeve që i jan gjetur me secilën prej kompanive të përfshira në tenderët e zhvilluar. Ndonëse në një deklaratë së fundmi Mërtiri ka bërë të ditur se nuk është ai Ilir Dedja dhe se ka paditur në gjykatë mediat që e kanë thënë një gjë të tillë, “City news albania” shkruan se në foton e publikuar nga mediat në Zimbabve, personi i identifikuar në diçiturë me emrin Ilir Dedja është pikërisht Klodian Mërtiri.
Por në krah të tij, shfaqet i buzëqeshur një emër i famshëm i politikës shqiptare, çka implikon në mënyrë të menjëhershme në këto afera dhe opozitën. Në krah të Mërtirit shihet Gert Bogdani, ish-kryetar i FRPD dhe këshilltar i Lulzim Bashës. Përfshirja e Bogdanit duket se e ka bërë të qartë arsyen përse prej kaq kohësh, Basha refuzon të çojë në SPAK dosjen e inceneratorëve.
Por Klodian Mëritri është siguruar t’i shtrijë lidhjet e tij në të gjitha drejtimet e duhura, për të blidnuar pozitat e tij nga çdo krah. Ajo që e bën edhe më të bujshme këtë aferë, është ortakëria e Mërtirit me bashkëshorten e drejtorit të përgjithshëm të “Top Channel” Ben Blushi.
Ai së bashku me Eva Blushin, dhe Klodian Zoton, rezultojnë aksionerë në një kompani në Bullgari të quajtur “EM Captial Group AD”. Në këtë mënyrë, Klodian Mërtiri ka siguruar mbështetjen jo vetëm nga ana e qeverisë, por gjithashtu nga ana e opozitës si dhe një prej mediave më të mëdha e më me ndikim në vend, siç është “Top Channel”.
Por teksa këto çështje prej ditësh qarkullojnë në mediat shqiptare, drejtësia në vend duket se është ende në gjumë.
Në Zimbabve, që është vend i botës së tretë, tejet i varfër dhe i pushtuar nga korrupsioni, ministri i Shëndetësisë i përfshirë në marrëveshjet me Klodian Mërtirin është arrestuar e pret të përballet me drejtësinë për aferën ku është përfshirë. Sakaq, në Shqipëri autoritetet heshtin, teksa punën e vetme investigative, po e kryejnë mediat.
