Para 1 viti Teatri Kombëtar i Operas, Baletit dhe Ansamblit Popullor bëri thirrje për një konkurs të ri, “Newbrand & Brandbook & Videokoncept i newbrandit – TKOBAP”, për të rinovuar imazhin e institucionet. Fituesi i konkursit do të shpërblehej me 1,845,000 lekë të reja dhe në projekt do të përfshihej një logo e re dhe brandimi (ridimensioni, faqosja, dizenjimi dhe prezantimi i produktit).
Në thirrjen e institucionit thuhej se punimet duheshin dorëzuar deri në 24 shkurt 2020, ndërkohë që pa u bërë fare publik fituesi është vendosur logoja e re. Pavarësisht se gara duhej të ishte transparente dhe e hapur nuk ka asnjë lloj informacioni dhe për më tepër logoja fituese ka rezultuar e vjedhur.
Logoja e vjedhur nga faqe të huaja
Logoja e Teatrit Kombëtar të Operas, Baletit dhe Ansamblit Popullor është marrë nga një faqe e huaj, ku me një pagesë 10 dollarë mund të marrësh logo falas të krijuar nga të tjerë. Logoja që po përdoret për institucionin më të lartë të artit në vend është publikuar 4 vite më parë në “Freepik” me emrin “Soundwave Background”.
Në njoftimin e Teatrit Kombëtar të Operas dhe Baletit thuhej se logoja duhet të ishte origjinale, moderne dhe se materialet do të dorëzoheshin të shoqëruara me një deklaratë autorësie si i vetmi zotërues dhe autor i tyre. Ndër të tjera thuhej se “autori duhet të pranojë përgjegjësi ligjore për sa i përket autenticitetit të punimeve të dorëzuara”.
Juria që ka përzgjedhur fituesin duket se nuk ka pasur kohë mjaftueshëm për të vërtetuar origjinalitetin e logos, që hapur është një kopjim i shëmtuar. Por përveç kësaj edhe tani që skandali u bë publik, nuk ka asnjë reagimi nga institucioni dhe nuk e dimë nëse autori i logos është vënë para përgjegjësisë ligjore për vjedhjen e tij.
Edhe nëse TKOBAP del me një deklaratë e thotë se autori i logos thjesht është frymëzuar nga Freepik edhe kjo gjë është e ndaluar. Freepik e bën të qartë se modelet që merren nga ky site nuk duhet të jenë elementë kryesorë, por mund të përdoren në sfond si elementë dytësorë, gjë që në këtë rast nuk ka ndodhur. Logot janë thuajse identike dhe nuk e dimë tashmë se çfarë justifikimi do të përdorë TKOBAP pas këtij rasti, që është një vjedhje e hapur.
