Një zhvillim i bujshëm ka tronditur politikën britanike, pasi ish-ambasadori i Mbretërisë së Bashkuar në Shtetet e Bashkuara, Peter Mandelson, është arrestuar nga policia në banesën e tij, raportoi gazeta The Times. Arrestimi vjen në kuadër të një hetimi të gjerë që lidhet me marrëdhëniet e tij me financierin amerikan Jeffrey Epstein.
Policia Metropolitane e Londrës konfirmoi se ka arrestuar një burrë 72-vjeçar për “shkelje të detyrës”, pa përmendur zyrtarisht emrin e Mandelson, megjithatë mediat britanike raportojnë se bëhet fjalë për ish-ambasadorin.
Mandelson, 72 vjeç, u shkarkua nga posti i tij në shtator, në një kohë kur nisën të dilnin në pah detaje mbi miqësinë e tij me Jeffrey Epstein, financieri amerikan i dënuar për krime seksuale, i cili ndërroi jetë në vitin 2019.
Më herët gjatë këtij muaji, autoritetet britanike nisën hetime zyrtare ndaj tij, pasi qeveria e kryeministrit Keir Starmer dorëzoi komunikimet mes ish-ambasadorit dhe Epsteinit. Hetimi synon të zbardhë natyrën e marrëdhënieve mes tyre dhe çdo veprim të mundshëm që mund të përbëjë shkelje ligjore.
Sipas akuzave që po hetohen, Mandelson dyshohet se i ka kaluar informacione të ndjeshme të tregut financierit amerikan gjatë kohës që shërbente si sekretar biznesi në qeverinë e ish-kryeministrit Gordon Brown, në periudhën e krizës financiare globale.
Dokumentet e publikuara në Shtetet e Bashkuara në kuadër të çështjes Epstein thuhet se përmbajnë të dhëna që sugjerojnë se Mandelson i ka zbuluar informacione miliarderit amerikan edhe gjatë kohës kur mbante poste të rëndësishme qeveritare në administratën e Tony Blair.
Autoritetet britanike po shqyrtojnë nëse këto komunikime përbëjnë shkelje të detyrës apo përdorim të informacionit zyrtar për qëllime të papërshtatshme.
Nga ana e tij, Peter Mandelson i ka mohuar kategorikisht të gjitha akuzat. Ai ka deklaruar vazhdimisht se nuk ka shkelur ligjin dhe nuk ka vepruar për përfitim personal, ndërsa ka shprehur keqardhje për miqësinë që kishte me Jeffrey Epstein.
Hetimet ndaj ish-ambasadorit pritet të vazhdojnë, ndërsa rasti ka ngjallur debat të fortë në opinionin publik britanik dhe ka rikthyer në vëmendje lidhjet e figurave të larta politike me financierin amerikan.
