Noel Dishi, i cili akuzohet për vrasjen e Vilson Tafçiut në zonën e Astirit në kryeqytet, do të mbetet në burg.
Gjykata ka qenë dakord me masën e kërkuar nga prokuroria “Arrest me burg”.
Nga salla e gjyqit, Dishi ka pranuar autorësinë e krimit, ndërsa ka sqaruar edhe arsyet, që e shtynë të qëllonte me armë mikun e fëmijërisë.
“Debatuam dhe Vilsoni më tha se do ta bëj me keq se sa ta kanë bërë. Do të mbaj në bagazh të makinës dhe do ta thyej koken’. Më pas edhe me shau. Tentova të largohesha, por ai vijonte me të njëjtën mënyrë. Atëherë e kam qëlluar. U trondita kur kuptova se çfarë bëra. Pasi e qëllova, u largova. Por asnjëherë nuk kam dashur që të vras shokun tim të fëmijërisë”, tha i pandehuri
Pak ditë më parë, burime jozyrtare për Gazetën Reforma bënë me dije se i riu është vrarë nga shoku i tij, pas një sherri në lidhje me një vajzë për disa kohë.
Pas ndarjes nga shoku i Tafçiut, vajza shoqërohej me 29-vjeçarin. Kjo ka bërë që dy shokët të konfliktoheshin.
Mbrëmjen e vrasjes, Vilson Tafçiu shoqërohej nga dy femra ende të paidentifikuara.
Nuk dihet nëse vajza në fjalë është njëra prej tyre.
