Pagesa e lindjes që jepet për gratë që sapo kanë lindur, do të merret në mënyrë elektronike, duke shmangur kështu të gjitha pengesat burokratike.
Ministri i Financave, Arben Ahmetaj i ka kërkuar Ministrisë së Shëndetësisë që i gjithë procesi i përfitimit të barrëlindjes të kalojë në mënyrë elektronike, pa pasur nevojë që përfitueset të paraqiten fizikisht në zyrat e shtetit.
Tashmë gratë shtatzëna dhe nënat me fëmijë nuk do të sorrollaten nëpër shumë institucione, si dhe të presin radhë të gjata nëpër sportelet e shtetit.
Si mund ta përfitosh pagesën e lindes:
Nënat me fëmijë ishin të detyruara që çdo muaj të merrnin një raport në konsultore, të cilin duhet ta dorëzonin tek punëdhënësi. Nga ky i fundit ato duhet të merrnin listëpagesën, të cilën më pas duhet ta dorëzonin po fizikisht tek Instituti i Sigurimeve Shoqërore.
Për të shmangur të gjithë këtë procedurë, çdo dokument i detyrueshëm për përfitimin e barrëlindjes do të lëshohet në mënyrë elektronike në të gjithë zinxhirin e institucioneve, nga konsultoret deri tek Instituti i Sigurimeve Shoqërore, pa pasur nevojë që gratë shtatzëna të paraqiten fizikisht në këto institucione.
E rëndësishme në këto ndryshime është dhe fakti se tashmë pagesa e barrëlindjes nuk do të kalohet më në llogarinë e punëdhënësit, siç bëhej më parë dhe pastaj e merrte përfituesja, por do të shkojë direkt në llogarinë personale të nënave përfituese.
