Fatkeqësisht është shënuar edhe viktima e dytë nga zjarret në Shqipëri! Pas vdekjes së 64-vjeçarit, Andrea Haxhiaj nga flakët në Asim Zenel në Gjirokastër, ka ndërruar jetë edhe gruaja e tij 57-vjeçare që ishte e shtruar në QSUT. Tatjana Haxhiaj ishte e shtruar prej 8 ditësh me djegie deri në 75% të trupit dhe si pasojë nuk mundi t’i mbijetonte plagëve.
Ndërsa Andrea Haxhiaj ndërroi jetë më 3 gusht në fshatin Asim Zeneli në Gjirokastër si pasojë e flakëve që rrethuan banesën e tij. Haxhiaj tentoi të shuante zjarrin në vreshtin që kishte në oborr, por si pasojë e flakëve ndërroi jetë.
Ndërkaq në një prononcim për Report Tv, miku i viktimës Andrea Haxhiaj ka bërë me dije se çifti ishte prindër i dy djemve. Njëri nga djemtë jetonte në Tiranë, ku shkollohet e punon, ndërsa djali tjetër jetonte me prindërit në Gjirokastër.
Fshati Asim Zenel u përfshi nga flakët që kishin rënë në afërsi të tij. Era e fortë favorizoi flakët dhe i çoi në drejtim të fshatit duke vënë në rrezik 3 fshatrat Krinë, Asim Zeneli dhe Arshi Lengo. Banorët e tre fshatrave u evakuuan, por në Asim Zenel situata ishte më kritike, me një bilanc prej dy viktimash.
Ndërkohë aktualisht në vend disa vatra zjarri janë shuar. Më në fund pas dy javësh luftë me flakët janë shuar zjarret në Karaburun që rrezikonin të preknin edhe Parkun Kombëtar të Lllogarasë.
Nga ana tjetër vatra e zjarrit në Majën e Rrunës në Kukës vazhdon të jetë aktive. Forcat zjarrfikëse dhe ato të mbrojtjes pyjore janë të angazhuara që në mëngjes për vënien në kontroll të vatrave.
Po ashtu në Tropojë janë evidentuar dy vatra zjarri aktive, ndërsa forcat e zjarrfikëse po punojnë prej orësh për të shuar flakët. Edhe në Bashkinë e Tropojës, janë evidentuar dy vatra zjarri të cilat vazhdojnë të jenë aktive, më konkretisht janë dy vatra zjarri në fshatrat Betosh dhe Lekbibaj. Sipas informacioneve në këtë zonë janë angazhuar 20 forca operacionale që po punojnë për të shuar flakët.
