Ministrja e Shëndetësisë dhe Mbrojtjes Sociale, Ogerta Manastirliu ka deklaruar se deri më tani janë testuar 42 persona në Shqipëri dhe rezultatet kanë dalë negative.
Ajo shprehet se në vendin tonë janë shtuar masat e sigurisë në mënyrë që të parandalohet koronavirusi.
“Shqipëria nuk ka asnjë rast të konfirmuar deri më tani. Puna nga kontrollet vazhdon. Deri më tani janë testuar 42 persona dhe kanë rezultuar negative. Dua të mbështes punën e strukturave tona në terren, ku po bëhet një punë voluminoze dhe intensive. Ata po plotësojnë të gjitha sfidat, deri në karantimin e rasteve. Padyshim spitalet tona, Infektivi, QSUT po koordinohen për sigurinë e pacientëve dhe qytetarëve. Nga ana tjerët po vijojmë masat duke shtuar provat, për t’u mbrojtur nga rrisku i këtij virusi”, u shpreh ministrja.
Ndërkohë Shefja e Shërbimit Infektiv në QSUT, Najada Çomo ka treguar se Shqipëria ka gati 80 shtretër për persona që dyshohet se janë të prekur nga koronavirusi.
Ndonëse aktualisht të gjitha rastet e testuar kanë rezultuar negative ajo shtoi se vërehet një fluks i personave të prekur nga virozat e stinës.
