Nuk keni pse shpenzoni para për të punësuar një person, ndërkohë që mund ta organizoni ju ditëlindjen e fëmijës suaj. Detajet janë shumë të rëndësishme, kështu që kushtojini vëmendje për të realizuar ditëlindjen ideale.
Zgjidhni vendin
Eliminojmë apriori shtëpinë. Ambienti i shtëpisë është shumë i vogël dhe të ftuarit sidomos fëmijët nuk do të kenë mundësi për të festuar dhe argëtuar. Zgjidhni një lokal, të cilin mund ta rregulloni për festa ose një ambient lojërash për fëmijë.
Animatorët
Nëse fëmija juaj është ende i vogël 1-3 vjeç ju këshillojmë të shmangni klounët (ndonjëherë janë disi të frikshëm edhe për të rriturit). Merrni parasysh moshën e fëmijëve dhe lojërat të cilat ata do të donin, më pas kontraktoni animatorët.
Bufeja
Janë të mirëpritura picat, sanduiçët, ëmbëlsirat, frutat në porcione të vogla sigurisht dhe çdo ushqim tjetër i përshtatshëm për fëmijë. Pijet zgjidhini pa kafeinë dhe pa gaz.
Ftesat
Mos u habisni edhe për ditëlindjet e fëmijëve mund të bëhen ftesa dhe shumë të bukura madje. Ato mund të shpërndahen nga mësueset për ata që janë në kopsht/shkollë dhe me mesazh për ata që nuk janë.
Dhurata
Bëni shumë kujdes në përzgjedhjen e saj. Edhe pse fëmijët tuaj mund të marrin shumë dhurata ajo e prindërve mbetet gjithmonë më e pritura ndaj keni parasysh preferencat e tyre. Sot ka shumë agjenci që merren me organizimin e festave por gjithsesi të merresh vetë me këtë festë të veçantë përveçse angazhimit është dhe një kënaqësi e pamasë kur shikon buzëqeshjen vesh më vesh të fëmijëve.
