AHA-të janë acidet alpha hydroxy-një kategori përzierjesh kimike që mund të jetë natyrale ose sintetike. Shumë prej tyre vijnë nga sheqernat organik, si psh, acidi glikolik (nga kallam sheqeri) dhe acidi laktik (nga qumështi).
Për çfarë përdoren?
AHA-të ofrojnë një eksfoliim kimik (heqje e qelizave të vdekura) si një alternativë e eksfoliimit manual, duke u përqendruar në tretjen/shkrirjen e lidhjeve midis qelizave të lëkurës në mënyrë që të lejohet heqja e qelizave të vdekura, e rrjedhimisht shfaqet një sipërfaqe lëkure më e butë dhe e lëmuar. Përqindjet e ulëta (1-4%) janë zakonisht të buta me lëkurën dhe te sigurta për përdorim vetjak ne shtëpi, ndërsa peeling kimik duke filluar nga 12% e lart, duhet të bëhen patjetër nën mbikëqyrjen e një mjeku profesionist. Acidi glikolik ka masë molekulare më të vogël se sa acidi laktik, kështu që depërton në lëkurë më thjeshtë dhe është më efektiv, por nga ana tjetër edhe mund të irritojë më kollaj lëkurën.
Cilat janë të mirat dhe të këqijat e përdorimit të AHA-ve?
AHA-të mundësojnë një lëkurë më të butë, dhe janë një alternativë shumë e mirë për personat që duan t’i shmangin eksfoliimet manuale. Duke qenë se veprojnë mbi sipërfaqen e lëkurës, mund të reduktojnë rrudhat e lehta, vijat e mimikës, njollat e errëta dhe shenjat e akneve. Acidi Glikolik veçanërisht mund të përdoret për trajtimin e lëkurave të yndyrshme dhe me tendencë akneike, duke qenë se ndihmon në eliminimin e qelizave të vdekura që shkaktojnë bllokimin e poreve dhe akumulimin të baktereve. Megjithatë, siç e përmenda edhe më sipër, mund të ketë edhe irritim sidomos tek personat me lëkure sensitive, kështu që fillojeni me një përqendrim të ulët. AHA-të mund të rrisin ndjeshmërinë nga drita, kështu që siguroheni që të aplikoni krem mbrojtës dielli (edhe pse këtë duhet ta aplikoni gjithsesi çdo ditë).
Burimi: Skinsanity
