Sa e vështirë është që të jesh artist në Shqipëri? Këtë mund të na e tregojnë vetëm ata që kanë përfunduar arsimin përkatës dhe nuk munden të ushtrojnë profesionin dhe pasionin e tyre.
Një pyetje për ata që bëjnë një profesion tjetër: E ke menduar ndonjëherë sesi do të ishte jeta jote nëse do të ishe arsimuar për të luajtur në piano, në violinë, me kitarë apo saks?
Mundësitë për të ushtruar profesionin dhe pasionin tuaj do të ishin të pakta, për shkak të mundësive që shpesh mungojnë.
Por asnjëherë mos hiq dorë! Këtë shprehje e keni lexuar apo e keni dëgjuar disa herë, por më mirë kur e besoni me vepra dhe e kuptoni nga eksperiencat e të tjerëve.
Ky çift ka vendosur që natën t’ia kushtojë dashurisë së tyre për muzikën. Çdo natë ata luajnë muzikë të mrekullueshme në rrugët e “Myslym Shyrit”, ndërsa marrin kënaqësinë për të ushtruar pasionin e tyre dhe janë në pritje të “vlerësimeve” të njerëzve.
Në fakt nuk është rasti i vetëm që keni hasur në rrugët e kryeqytetit! Nëse kaloni në rrugën e Pedonales, një vajzë ju bën që ta shijoni më shumë atë pjesë të qytetit përmes tingujve të violinës. Apo mund të keni hasur një të moshuar që këndon dhe luan të fizarmonikë para “Shtëpisë së Gjetheve”
Ky fenomen është më shumë i njohur në vendet evropiane, por për Shqipërinë tonë të vogël me paragjykime të mëdha, gjëja më e bukur që mund të bëni ndërsa kaloni bri tyre është të jepni përkrahjen tuaj. Ajo monedhë nuk kushton asgjë për ne, ndërsa nënkupton shumë për ta.
“Faleminderit për muzikën që më ofron dhe dua të të dëgjoj sërish”, këtë fjali mund ta “flasë” një monedhë.
Burimi: Iconstyle.al
