Ajo është vetëm 20 vjeç, dhe nëse ju duket një moshë e vogël për t’u bërë e suksesshme atëherë mund t’ju themi se Eni Koçi është bërë e famshme që në moshën 12 vjeçare.
Ishte nëntori i vitit 2008, kur Eni Koçi publikoi këngën “Shpresë kërkon nga ti”, një këngë që u pëlqye shumë dhe pati sukses në tregun muzikor shqiptar.
Fillimisht u bë e njohur si motra e Greta Koçit, por pak kush e di që Eni ka filluar të këndojë që në moshën 7-vjeçare. Në moshën 10-vjeçare ajo fitoi çmimin e dytë në Festivalin Kombëtar për Fëmijë me këngën “Dhoma me Lodra”.
Më 2 maj 2009, Eni mori pjesë në koncertin e saj të parë para publikut shqiptar në Athinë. Në muajin mars 2009, realizon këngën e saj të tretë, por këtë radhë në bashkëpunim me motrën e saj Greta Koçi. Kënga titullohej “Në bëjmë dëm” dhe vetëm pse kishte kaluar një vit, Eni kishte ndryshuar, dukej më e rritur.
Suksesi i saj vijon më tej në maj 2009, vit kur Eni fitoi në netët e klipit shqiptar çmimin “Videoklipi më i mirë debutues”.
Në vitin 2010, Eni mori pjesë në festivalin “Kënga Magjike” në bashkëpunim me Capital T , titulluar “Diva”. Më pas ajo vijoi me një sërë bashkëpunimesh të suksesshme solo dhe me reperin Noizy.
Që prej daljes së saj të parë në publik në vitin 2008, Eni është rritur si profesionalisht ashtu edhe fizikisht. Sot ajo është bërë një zonjushë e vërtetë, e përkushtuar ndaj studimeve në Angli.
Edhe pse 20 vjeç, Eni surprizon për sensualitetin dhe pjekurinë jo tipike të moshës. Kjo ka bërë që shpesh herë ajo të jetë pjesë e akuzave për operacione plastike dhe ndërhyrjeve në fytyrë. Krahasimi i fotove kur ajo është shfaqur për herë të parë në skenë, me fotot e sotme është i dukshëm, megjithatë Eni nuk ka bërë asnjë prononcim për këtë.
Mediat kanë shkruar vazhdimisht për ndërhyrje në buzë, hundë dhe vetulla, aq sa shpesh është konsideruar më e madhe në moshë se sa është realisht. Fotot që tregojnë ecurinë e karrierës muzikore të Eni Koçit, ju japin mundësi të gjithëve ta gjykojnë të vërtetën.
Së fundi këngëtarja ka pohuar se është duke punuar në një projekt të ri.
“Le të flasim për të. Kënga e re po vjen së shpejti”, ka shkruar në Instagram, Eni.
Nuk dihet se për çfarë kënge bëhet fjalë, por bazuar në fotografinë që e ka shoqëruar me mesazhin, duket se do të jetë një këngë me skena joshëse.
Burimi:Iconstyle
