Ministria e Shëndetësisë njoftoi në mes të muajit korrik se pas konsultimit me Komitetin Teknik të Ekspertëve vendosi lejimin e zhvillimit të analizave të gjakut për antitrupat edhe në klinikat private. (KLIKO)
Pas vendimit për kryerjen e testimeve serologjike në laboratorë privatë, në funksion të rritjes së kapaciteteve për përballimin e situatës me pandeminë, Ministria e Shëndetësisë (KLIKO) informoi në 23 korrik me anë të disa rreshtave se tamponi për Covid-19 do të kryehet edhe në laboratorët privatë për të gjithë ata persona që do të lëvizin jashtë vendit dhe analiza është kusht për vendin që ata duan të udhëtojnë.
Pyetja e parë që ngritëm është sa do kushtojnë?
Nga një vëzhgim i kryer disa ditë më parë nga “Iconstyle.al” rezultoi se shumë prej laboratorëve që e ofrojnë këtë shërbim kanë të njëjtin çmim, 4000 lekë të reja, duke vendosur kështu një oligopol me çmimet e tyre. Në mënyrë të qartë dhe në shumicë institucionet rregullatore të tregjeve dhe Autoriteti i Konkurrencës, që lidhet drejtpërdrejtë me çështjen, dhe që paguhen nga taksapaguesit shqiptarë për të mbrojtur interesat publike, me veprimet dhe mosveprimet e tyre i shërbejnë interesave të tilla me shenja të qarta subjektivizmi dhe korrupsioni. (Lexo këtu)
Përtej shqetësimeve tona, çmimi mbeti i pandryshueshëm, teksa akoma më marramendës është çmimi i tamponit, 95 euro.
Testet serologjike dhe tamponi në rajon
Në Maqedoninë e Veriut testi serologjik kushton nga 20 deri 35 euro, kurse testi me tampon kushton nga 60-70 euro. Sakaq, në Serbi një test serologjik kushton 17 euro. Në Mal të Zi testi serologjik kushton nga 17 deri në 22 euro. Edhe në Kosovë çmimi i tamponit varijon nga 20 deri 50 euro. Ndërsa në Itali tamponi varijon nga 70 deri në 90 euro.
Një matematikë e thjeshtë!
Aparatura që po shihni në foto është prodhim i firmës zviceriane “Roche”, e quajtur “Cobas 6800”, e cila kryen tamponin.
Nga një komunikim i “iconstyle.al” me përfaqësuesin e kësaj firme në Shqipëri, disa javë më parë na u bë me dije se kjo aparaturë kushton 320 mijë euro dhe kryen 384 teste në orë, që përkthehen në 9,240 teste në ditë.
Kjo do të thotë se një laborator në vendin tonë me çmimin 95 euro të tamponit arkëton 877,800 euro në ditë dhe për 30 ditë 26, 334,000 euro. Pra, përfiton shifra marramendëse, kur kostot duken të papërfillshme.
Atëherë, pse shqiptarët paguajnë më shumë nga të gjithë?
Ajo që shihet qartazi në këtë situatë është se Covid-19 po përdoret për politikë dhe biznes. Ishte drejtuesi i laboratorit ‘Intermedica’, Vasil Llajo, ai që në muajin prill në dy intervista të dhëna për News 24 i ofroi publikisht pajisjen ‘Roche 4800’ Institutit të Shëndetit Publik, për kryerjen e analizave serologjike dhe PCR, me qëllim përballimin e situatës. Mirëpo, ky i fundit e refuzoi diçka të tillë duke deklaruar se nuk ka kapacitet. (KLIKO)
Minimalisht, ajo që duhet të bëjë shteti në këtë rast është të ndërhyjë, duke rregulluar çmimet, që siç shihen janë më të lartat në rajon.
Autoriteti i Konkurrencës vijon të rrijë duarkryq!
Sidomos në raste të tilla, ku vihet në lojë shëndeti i shqiptarëve në një kohë pandemie, është e papranueshme që Autoriteti i Konkurrencës nuk ka ndërmarrë paraprakisht masa për të ndaluar rritjen e çmimeve të testeve serologjike dhe tamponeve. (KLIKO)
“Iconstyle.al” i ka kërkuar publikisht Autoritetit të Konkurrencës të shohë mënyrën sesi është ndërtuar dhe funksionon kryerja e analizave, në zbatim të përgjegjësive ligjore që Autoriteti ka, por deri tani nuk ka ende asnjë lëvizje. Jo vetëm që Autoriteti i Konkurrencës nuk na ka kthyer përgjigje, por nuk ka lajmëruar as publikisht për nisjen e ndonjë hetimi apo vëzhgimi për këtë rast. Kështu, edhe një herë na vërtetoi se nuk i bëjnë përshtypje anomali të tilla dhe vijon propagandën qeveritare.
