“Nga rastësia lindin dashuri të mëdha”. Kjo shprehje do t’u shkonte për shtat shumë historive të dashurisë që lindin rastësisht.
Rastësia ka bashkuar edhe zemrën e këngëtares Gerta Mahmutaj me atë të DJ të njohur John Van Ride, të cilët përmes muzikës i përcjellin publikut himnin e tyre të dashurisë.
Prej vitesh Gerta Mahmutaj dhe John Van Ride po jetojnë një histori të bukur dashurie dhe këtë e kanë përcjellë përmes këngëve dhe bashkëpunimeve të njëpasnjëshme.
Bashkëpunimi i fundit është kënga ritmike “Për ty”, ku çdo zemër e dashuruar do të gjejë veten.
Të bashkëpunosh me njeriun e zemrës, sipas Gertës është një kënaqësi. Në një intervistë për portalin “Iconstyle.al”, këngëtarja shprehet se partneri i saj e di se çfarë i pëlqen, çfarë e frymëzon dhe ky është çelësi i marrëdhënies së tyre.
Gerta është rritur në skenë! Që prej daljes së saj në “Gjeniun e Vogël”, pjesëmarrjen në festivale me vëllain Klejti, ajo ka qenë gjithmonë e rrethuar nga artistë.
Aurela Gaçe është një prej emrave të mëdhenj të muzikës që ka ndikuar në formimin e Gertës përmes përvojës së saj në skenën shqiptare. Përpos lidhjes familjare mes tyre, pasi John Van Ryde, i cili është vëllai i bashkëshortit të Aurelës, Gerta e rendit Aurelën në listën e saj të këngëtareve të preferuara.
Por ku e sheh Gerta veten pas 5 vitesh? Çfarë profesioni do të zgjidhte përpos muzikës dhe të tjera detaje nga jeta e saj, mund t’i lexoni në intervistën e mëposhtme që ju sjell “Iconstyle.al””
Intervista e plotë me këngëtaren Gerta Mahmutaj:
– Ka kaluar 1 muaj që kur është publikuar kënga “Për ty” me tekstin e realizuar nga ju dhe John Van Ride. Cili është mesazhi që përcillni?
Mesazhi është i thjeshtë por kuptimplotë. Teksti flet për dashurinë ndërmjet dy individëve dhe siç ndodh në jetën reale shpesh është rastësia ajo që bashkon dy zemra. E thënë shkurtimisht: Nga rastësia lindin dashuri të mëdha.
– A është “Për ty” një “himn” i dashurisë tuaj?
“Për ty”është himn i të gjithë dashurive. Edhe e jona është e tillë, por qëllimi nuk ka qenë që ne të rrëfejmë historinë tonë përmes kësaj kënge. Melodia dhe teksti është për këdo që i pëlqen muzika dhe gjen veten aty.
-Çfarë të frymëzon për të shkruar tekstin e një kënge?
Më frymëzojnë gjërat e thjeshta, të vogla, ato gjëra të cilat i prekim çdo ditë në realitetin që na rrethon. Më frymëzon më së shumti ideja se atje jashtë ka shumë njerëz të cilët duan të dëgjojnë këngë që flasin për ndjenja dhe ideale të pastra siç është dashuria në këtë rast.
– Si është të bashkëpunosh me njeriun e zemrës? Gjërat pozitive dhe ato “negative” (nëse ka)?
Në qoftë se do më duhej ta përkufizoja me një fjalë të vetme bashkëpunimin do të thosha: kënaqësi. Aspekti pozitiv është se ti punon me dikë i cili të njeh mirë, e di çfarë të pëlqen, çfarë të rri përshtat, e di çfarë të frymëzon, këto janë shumë të rëndësishme në një proces krijues të çfarëdo natyre. Aspekt negativ në qoftë se do e quaja të tillë është se ti e ndjen më shumë mungesën e tij, në rastet kur të duhet të krijosh, të performosh pa praninë e tij.
-Përpos klipit të ri, a do ta shohim Gertën në ndonjë festival këtë vit? Nëse po, do të vish solo apo në bashkëpunim?
Planet e mia në muzikë përfshijnë sigurisht dhe realizimin e klipeve edhe pjesëmarrjen në festivalet e skenave shqiptare. Preferoj të mos flas në mënyrë konkrete për ato që do të vijnë, ajo çfarë mund të them është se përpiqem çdo ditë të marr vendime të mira në sferën profesionale.
-Do të ketë sërish ndonjë bashkëpunim me kompozitorin Adi Hila?
Adi Hila ka qenë që prej fillimit të karrierës sime, një kompozitor të cilit i kam besuar shumë. Mendoj se do të vazhdoj t’i besoj deri në fund , bashkëpunimet me të janë fat dhe kënaqësi.
– Ti je rritur në skenë dhe je pjesë e një familje të madhe artistësh. Kujt i merr mendim të parit për idetë e tua në lidhje me muzikën?
Kam pasur fatin të jem rrethuar nga artistë, të cilët me përvojën e tyre kanë gjetur një këshillë në kohën dhe vendin e duhur. Nuk mund të përcaktoj një emër të vetëm, çdo bashkëpunim më ka mësuar gjëra të reja.
-Nëse nuk do të ishe bërë këngëtare, çfarë profesioni do të kishe zgjedhur?
Profesioni im i dytë, ai në të cilin kam marr formimin tim akademik është psikologjia. Nuk është çudi nëse në një të ardhme do të më shihni edhe në këtë rol, si psikologe.
-Ku do ta shohim Gertën këtë verë? Ke plane për ndonjë tur koncertesh?
Në verë do jem e angazhuar në koncerte dhe live të ndryshme. Sigurisht përmes mediave sociale do të mund të informoheni për aktivitet e mija hap pas hapi.
–Cila është ajo gjë që fansat e tu do të surprizoheshin nëse do ta mësonin për ty?
Unë jam Gerta, jam njeri i thjeshtë përpara se të jem këngëtare në skenë. Si e tillë, çdo fakt i jetës sime qoftë private apo profesionale është normal, si i çdo njeriu tjetër në një profesion tjetër.
-Ka ndonjë rrymë muzikore që nuk e “duron” dot?
Muzika është gjithnjë e bukur në qoftë se ka art të vërtetë qoftë në melodi, qoftë në tekst. Kur një këngë është e bukur, thjesht është e tillë pavarësisht rrymës që i përket. Kështu që nuk do të mund të kategorizoja dot.
-Këngëtari shqiptar i preferuar? Një emër, ose me shumë
Aurela Gace, Elita 5
– Sa rëndësi i kushton pamjes dhe si vishet Gerta në jetën e përditshme?
Pamja është një element i cili tregon shumë mbi personalitetin e çdo individi. Nuk më pëlqen të jem strikte dhe të qëndroj gjithë kohës në një stil të vetëm. Veshja është në funksion të mënyrës sesi ndihemi kështu që përpiqem ta përshtat me kohën, ambientin dhe gjendjen emocionale.
-Çfarë duhet të provojë të paktën një herë në jetën e saj një femër?
Sigurisht, dashurinë, më gjithë dimensionet që ajo ka.
– Pa kë produkt bukurie nuk bën dot?
Pa parfumin tim.
– Ku e sheh veten pas 5 vjetësh?
Pas 5 vjetësh veten e shoh në studio, duke u përgatitur për këngën time të re.
Burimi: Iconstyle.al
