Këngëtarja Ronela Hajati nuk ia arriti dot të shkonte drejt finales së “Eurovision”, por performanca e saj arriti të tërheqë vëmendjen e të fitojë zemrën e shumë shikuesve.
Sot në “Shqipëria Live” u fol pikërisht në lidhje me performancat e mbrëmshme, ku fokusi më i madh ishte pikërisht te Ronela Hajati.
Kryeredaktori i “Wiwiblogs”, William Lee Adams foli nëpërmjet “Skype” lidhur me çdo gjë që ndodhi mbrëmë.
Mirëpo, prezantuesit e programit pyetën Adams se përse sipas tij Ronela nuk e ‘preku’ dot finalen e madhe.
“Nuk e dimë derisa të shohim rezultatet të shtunën. Por tani është e vështirë të themi. Rezultatet e jurisë jepen pas finales së madhe. Ka patur 200 gazetarë, brohoritma shumë dhe është pëlqyer performanca e Ronelës. Juria do të zbulojë votat pas finales së madhe”, theksoi Lee Adams.
Gjithashtu, ai bërë me dije se ka patur një komunikim me Ronelën.
William Lee Adams shtoi se këngëtarja shqiptare dukej paksa e lënduar.
“Kam biseduar përmes ‘WhatsApp’ pas rezultateve për në finale. Më nisi një foto dhe duket se është pak e lënduar. Por ka fituar shumë fansa nga e gjithë Europa”, nënvizoi ai.
Ronela Hajati edhe pse nuk arriti të futej në finale, arriti të shkaktojë shumë komente në rrjet me performancën e saj si dhe shumë klikime në kanalin e Youtube të “Eurovision”.
